នៅថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩  នាទីស្តីការក្រសួងមហាផ្ទៃ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអញ្ជើញជាអធិបតី ដឹកនាំពិនិត្យ និងពិភាក្សាលើសេចក្តីព្រាងរបាយការណ៍ ស្តីពីលទ្ធផលការងារត្រួតពិនិត្យគ្រឿងញៀនឆ្នាំ២០១៨ និងលើកទិសដៅការងារឆ្នាំ២០១៩។ ក្នុងកិច្ចប្រជុំអាជ្ញាធរជាតិប្រយុទ្ធប្រឆាំងគ្រឿងញៀននាថ្ងៃនេះ គឺមានគោលបំណងពិនិត្យ និងសម្រួលលើសេចក្តីព្រាងខ្លឹមសារនៃរបាយការណ៍បូកសរុបលទ្ធផលការងារប្រចាំឆ្នាំ២០១៨ និងលើកទិសដៅអនុវត្តបន្ត ដោយផ្តោតលើចំណុចសំខាន់ៗចំនួន៥ ដូចជា៖ ១. បរិយាយអំពីសភាពការណ៍គ្រឿងញៀនក្នុងតំបន់ សកលលោក និងនៅប្រទេសកម្ពុជា ២. បរិយាយអំពីការងារដឹកនាំរបស់ស្ថាប័នកំពូលថ្នាក់ជាតិ និងការងារដឹកនាំអាជ្ញាធរជាតិប្រយុទ្ធប្រឆាំងគ្រឿងញៀន ៣. បរិយាយអំពីលទ្ធផលការងារត្រួតពិនិត្យគ្រឿងញៀន រួមមានការកាត់បន្ថយតម្រូវការគ្រឿងញៀន ការព្យាបាល និងស្តារនីតិសម្បទាអ្នកញៀនគ្រឿងញៀន ការកាត់បន្ថយការផ្គត់ផ្គង់គ្រឿងញៀន ការពង្រឹងប្រសិទ្ធភាពស្ថាប័នអនុវត្តន៍ច្បាប់ កិច្ចសហប្រតិបត្តិការអន្តរជាតិជាមួយប្រទេសជាប់ព្រំដែន កិច្ចសហប្រតិបត្តិការអន្តរជាតិជាមួយប្រទេសក្នុងតំបន់និងដៃគូអភិវឌ្ឍន៍នានា និងការពង្រឹងយន្តការត្រួតពិនិត្យគ្រឿងញៀនថ្នាក់ជាតិ និងថ្នាក់ក្រោមជាតិ  ៤. ការសន្និដ្ឋាន និងវាយតម្លៃ ៥. ទិសដៅត្រួតពិនិត្យគ្រឿងញៀនឆ្នាំ២០១៩។

      សូមបញ្ជាក់ផងដែរថា អាជ្ញាធរជាតិប្រយុទ្ធប្រឆាំងគ្រឿងញៀន នឹងធ្វើសន្និបាតបូកសរុប ស្តីពីលទ្ធផលការងារត្រួតពិនិត្យគ្រឿងញៀនឆ្នាំ២០១៨ និងលើកទិសដៅការងារឆ្នាំ២០១៩ នាថ្ងៃទី២០ ខែមីនា ឆ្នាំ២០១៩ ស្អែកនេះ៕ មុនីរម្យ


ដោយ៖ នាយកដ្ឋានព័ត៌មានវិទ្យា