សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានប្រកាសទៅដល់ឈ្មួញទុច្ចរិតទាំងអស់ ដែលកំពុងប្រើប្រាស់សកម្មភាពល្មើសរបស់ខ្លួនបង្កហានិភ័យ និងប៉ះពាល់ដល់សុខភាពរបស់ប្រជាពលរដ្ឋ ហើយក៏សូមបញ្ឈប់ការយកអំណាចទៅអន្តរាគមន៍បទល្មើស
នានា ដែលក្នុងនោះមានទាំងបទល្មើសផលិតផលក្លែងក្លាយនេះផងដែរ។
សម្តេចក្រឡាហោមមានប្រសាសន៍បែបនេះក្នុងពិធីកម្ទេចផលិតផលក្លែងក្លាយ-ខុសច្បាប់ ចំនួនជាង ៧០តោននៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ នៅព្រឹកថ្ងៃអង្គារ ៧កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែមីនា ឆ្នាំ២០១៩ ដែលរៀបចំដោយគណៈកម្មាធិការប្រយុទ្ធប្រឆាំងផលិតផលក្លែងក្លាយ(គ.ប.ផ.ក)។
សម្តេចក្រឡាហោម ស ខេង បានណែនាំដល់គណៈកម្មាធិការត្រូវតែរួមគ្នាជាមួយស្ថាប័នជំនាញពាក់ព័ន្ធទាំងអស់យកចិត្តទុកដាក់ទប់ស្កាត់ផលិតផលក្លែងក្លាយដែលយើងទទួលទានប្រចាំថ្ងៃដូចជាៈ ថ្នាំពេទ្យ ចំណីអាហារ គ្រឿងបរិភោគនានា និងភេសជ្ជៈជាដើម ដែលអ្នកប្រើប្រាស់ និងទទួលទានគឺជាប្រជាពលរដ្ឋ រួមនឹងខ្លួនយើងទាំងអស់គ្នាផង ពីព្រោះវាបណ្តាលអោយខាតបង់ប្រាក់កាស និងប៉ះពាល់ដល់សុខភាពយ៉ាងធ្ងន់ធ្ងរ ថែមទាំងអាចបណ្តាលឲ្យគ្រោះថ្នាក់ដល់អាយុជីវិតថែមទៀតផងដែរ។ សម្តេចក្រឡាហោម បានអំពាវនាវទៅដល់ប្រជាពលរដ្ឋគ្រប់ៗរូប គ្រប់ស្រទាប់ រួមទាំងវិស័យឯកជន និងក្រុមហ៊ុនម្ចាស់ដើម នៃផលិតផលផងដែរ សូមចូលរួមជាមួយនឹងគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្នុងការសហការ និងផ្តល់ព័ត៌មានអំពីប្រភពនៃការផលិត ការចរាចរ ការចែកចាយនូវផលិតផលក្លែងក្លាយ ដើម្បីឈានទៅធ្វើការបង្រ្កាបឲ្យបានទាន់ពេលវេលា ។ ទន្ទឹមនឹងការខិតខំប្រឹងប្រែងនានា គណៈកម្មាធិការប្រយុទ្ធប្រឆាំងផលិតផលក្លែងក្លាយក៏ត្រូវខិតខំអប់រំ ផ្សព្វផ្សាយ ណែនាំដល់បងប្អូនប្រជាពលរដ្ឋ និងអាជីវករដើម្បីឲ្យបានយល់ជ្រួតជ្រាបអំពី ហានិភ័យដែលបណ្តាលមកពីការប្រើប្រាស់ផលិតផលក្លែងក្លាយនេះផងដែរ។ សម្តេចក្រឡាហោមបន្តថា ក្រោមការខិតខំប្រឹងប្រែងរបស់រាជរដ្ឋាភិបាល ដែលមានក្រសួងមហាផ្ទៃ ជាអ្នកដឹកនាំផ្ទាល់លើគណៈកម្មាធិការប្រយុទ្ធប្រឆាំងផលិតផលក្លែងក្លាយ និងក្រសួងពាក់ព័ន្ធដ៏ទៃទៀត បានរួមគ្នាយកចិត្តទុកដាក់យ៉ាងខ្លាំង ក្នុងការបង្ការ ទប់ស្កាត់ និងបង្រ្កាបការធ្វើចរាចរផលិតផលក្លែងក្លាយនេះ។ សម្តេចក្រឡាហោមបន្ថែមថា ទន្ទឹមនឹងការខិតខំប្រឹងប្រែងនានា គណៈកម្មាធិការប្រយុទ្ធប្រឆាំងផលិតផលក្លែងក្លាយ ក៏ត្រូវ ខិតខំអប់រំ ផ្សព្វផ្សាយ ណែនាំដល់បងប្អូនប្រជាពលរដ្ឋ និងអាជីវករដើម្បីឲ្យបានយល់អំពីហានិភ័យដែលបណ្តាលមកពីការប្រើប្រាស់ផលិតផលក្លែងក្លាយ ។ ជាងនេះទៅទៀត សមត្ថកិច្ច ពាក់ព័ន្ធគ្រប់លំដាប់ថ្នាក់ ក៏នឹងបន្តការខិតខំព្យាយាម និងរួមសហការគ្នាជាមួយគណៈកម្មាធិការក្នុងការ បង្ការ ទប់ស្កាត់ និងបង្រ្កាបរាល់ផលិតផលក្លែងក្លាយដែលកំពុងចរាចរក្នុងព្រះរាជាណាចក្រកម្ពុជា ដើម្បីថែរក្សាសុខភាព និងសុខុមាលភាពរបស់ប្រជាពលរដ្ឋ ស្របតាមយុទ្ធសាស្រ្តចតុកោណដំណាក់ កាលទី៤ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ។
សូមបញ្ជាក់ថា ក្នុងឆ្នាំ២០១៨កន្លងទៅ សមត្ថកិច្ចចម្រុះដឹកនាំដោយ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានធ្វើប្រតិបត្តិការ ចាប់ឃាត់នូវផលិតផលក្លែងក្លាយ-ខុសច្បាប់ ដែលផលិត ស្តុកទុក និងចែកចាយ បានចំនួន ២០ករណី និងចុះបង្រ្កាបនៅនឹងទីតាំង ផ្ទាល់បាន ៨ករណី មានដូចជាៈ ករណី នាំចូល ចែកចាយ ផលិតផលគ្រឿងសំអាងក្លែងក្លាយ រំលោភច្បាប់កម្មសិទ្ធិបញ្ញា បង្ក្រាបទីតាំងផលិតប្រេងម៉ាស៊ីនក្លែងក្លាយ-ខុសច្បាប់ បង្ក្រាបទីតាំងចែកចាយជីកសិកម្មក្លែងក្លាយ-ខុសច្បាប់ បង្រ្កាបសិប្បកម្មផលិតទឹកខ្មេះ ទឹកសៀង ទឹកម្ទេស ទឹកស៊ីអ៊ីវ ខុសច្បាប់ បង្រ្កាបទីតាំងសាច់ប៉ាតេ មិនអនុលោមតាមច្បាប់ និងបង្រ្កាបសិប្បកម្មផលិតម្រេច និងកាហ្វេ ក្លែងក្លាយ-ខុសច្បាប់ជាដើម៕ គឹមអាន
ដោយ៖ នាយកដ្ឋានព័ត៌មានវិទ្យា
