នៅរសៀលថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែមីនា ឆ្នាំ ២០១៩ នាទីស្តីការក្រសួង សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ បានអនុញ្ញាតឲ្យ ឯកឧត្តម ង្វៀន ណាមហាយ អនុប្រធានគណៈអក្សរសម្ងាត់រដ្ឋាភិបាលនៃសាធារណរដ្ឋសង្គមនិយមវៀតណាមចូលជួបសម្តែងការគួរសម និងពិភាក្សាការងារ។
យោងតាមប្រសាសន៍របស់ ឯកឧត្តម ផាត សុផានិត អ្នកនាំពាក្យរងក្រសួងមហាផ្ទៃ បានបញ្ជាក់ឲ្យដឹងថា សម្តេចក្រឡាហោម ស ខេង បានថ្លែងនូវការកោតសរសើរចំពោះវឌ្ឍនភាពនៃការរីកចម្រើនតាមរយៈការបំពេញទសន្សកិច្ចរបស់គណៈប្រតិភូវៀតណាមកន្លងមកថ្មីនេះ គឺពិតជារួមចំណែកក្នុងការពង្រឹងពង្រីកកិច្ចសហប្រតិបត្តិការកាន់តែរឹងមាំថែមទៀត នូវទំនាក់ទំនងរវាងកម្ពុជា និងវៀតណាម។ ឯកឧត្តមបានបន្ថែមថា សម្តេចក្រឡាហោម បានជម្រាបជូនចំពោះភាគីវៀតណាមដែលថា វិស័យអក្សរសម្ងាត់នេះពិតជាមានសារៈសំខាន់ណាស់ក្នុងការចូលរូមថែរក្សាដល់សន្តិសុខ និងសុវត្ថិភាពសង្គម ហើយពិធីចុះហត្ថលេខាផែនការសហប្រតិបត្តិការឆ្នាំ២០១៩ លើវិស័យអក្សរសម្ងាត់ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយគណៈអក្សរសម្ងាត់រដ្ឋាភិបាល នៃសាធារណរដ្ឋសង្គមនិយមវៀតណាមនេះពិតជារួមចំណែកដល់ការថែរក្សាសន្តិសុខ សណ្តាប់ធ្នាប់សង្គមឱ្យកាន់តែរឹងមាំបន្ថែមទៀត។ សម្តេចក្រឡាហោម ក៏បានថ្លែងអំណរគុណដល់ផែនការ និងទិសដៅឆ្នាំ២០១៩ ដែលភាគីទាំងពីរឯកភាពគ្នាសម្រាប់អនុវត្តបន្តក្នុងឆ្នាំ២០១៩នេះ ដែលក្នុងនោះភាគីវៀតណាមនឹងជួយបណ្តុះបណ្តាលដល់ធនធានមនុស្សរបស់កម្ពុជាលើវិស័យអក្សរសម្ងាត់នេះផងដែរ។
ឯកឧត្តម ផាត សុផានិត បានបញ្ជាក់ផងដែរថា ឯកឧត្តម ង្វៀន ណាមហាយ អនុប្រធានគណៈអក្សរសម្ងាត់រដ្ឋាភិបាល នៃសាធារណរដ្ឋសង្គមនិយមវៀតណាម សូមថ្លែងអំណរគុណ និងរីករាយក្នុងការជម្រុញលើកកម្ពស់នូវទំនាក់ទំនងរវាងភាគីទាំងពីរកម្ពុជា និងវៀតណាមលើវិស័យអក្សរសម្ងាត់នេះ ហើយតាមរយៈផែនការដែលភាគីទាំងពីរចុះហត្ថាលេខាសម្រាប់កិច្ចសហប្រតិបត្តិឆ្នាំ២០១៩ វៀតណាមនឹងបន្តជួយបណ្តុះបណ្តាលធនធានមនុស្សកម្ពុជានៅលើវិស័យអក្សរសម្ងាត់នេះផងដែរ៕ គឹមអាន
ដោយៈ នាយកដ្ឋានព័ត៌មានវិទ្យា