សម្តេចក្រឡាហោម ស ខេង ឧបនាយរដ្ឋមន្រ្តី រដ្ឋមន្រ្តី ក្រសួងមហាផ្ទៃ បានអំពាវនាវ តាមរយៈទំព័របណ្តាញសង្គមផ្លូវការរបស់សម្តេចថា សូមប្រជាជនទូទាំងប្រទេសគាំទ្រ និងចូលរួមទាំងអស់គ្នាក្នុងព្រឹត្តិការណ៍ជំរឿន នាពេលខាងមុខនោះឲ្យបានគ្រប់ៗគ្នាប្រកបដោយភាពស្មោះត្រង់ ក្នុងការផ្ដល់ព័ត៌មានតាមការសម្ភាសន៍ឲ្យបានគ្រប់គ្រាន់ និងត្រឹមត្រូវ ជូនដល់មន្ត្រី ជំរឿន ដើម្បីជាប្រយោជន៍របស់បងប្អូន ជនរួមជាតិ និងដើម្បីប្រទេសជាតិយើងទាំងមូលផងដែរ។
សូមបញ្ជាក់ថា ជំរឿនទូទៅប្រជាជន នៅទូទាំងប្រទេស នឹងប្រព្រឹត្តទៅចាប់ ពីថ្ងៃទី ០៣ ដល់ ១៣ ខែមីនា ឆ្នាំ២០១៩ខាងមុខនេះ ហើយការធ្វើជំរឿននេះគឺជាលើកទី៣ហើយ នៅក្នុងប្រវត្តិសាស្ត្រកម្ពុជា ដែលជាទូទៅធ្វើឡើរៀងរាល់ ១០ឆ្នាំ ម្ដង ដើម្បីទទួលបានទិន្នន័យប្រជាសាស្ត្រ ជាក់លាក់ សម្រាប់ ប្រើប្រាស់ រៀបចំតាក់តែងគោលនយោបាយឲ្យបានត្រឹមត្រូវ និងដើម្បីធ្វើជាសូចនាករក្នុងការតាមដានត្រួតពិនិត្យ ផែនការយុទ្ធសាស្ត្រអភិវឌ្ឍន៍ ជាតិ និងគោលដៅអភិវឌ្ឍន៍ប្រកបដោយ ចីរភាព របស់កម្ពុជា ២០១៦-២០៣០ ដោយមិនទុកឲ្យនរណាម្នាក់ឯកោឡើយ៕ គឹមអាន
ប្រភពៈ ទំព័របណ្តាញសង្គមផ្លូវការរបស់សម្តេចក្រឡាហោម ស ខេង