សម្ដេចក្រឡាហោម ស ខេង ឧបនាយរដ្ឋមន្រ្តី រដ្ឋមន្រ្តី ក្រសួងមហាផ្ទៃ បានមានប្រសាសន៍ស្នើឲ្យក្រុមការងារថ្នាក់ខេត្ត ថ្នាក់ស្រុក ត្រូវយកចិត្តទុកដាក់ក្នុងការផ្តល់សេវាសាធារណៈដល់ប្រជាពលរដ្ឋ ដែលត្រូវមានលេខទូរស័ព្ទ និងបណ្ដាញណាមួយដើម្បីឲ្យពលរដ្ឋងាយស្រួលផ្ដល់ព័ត៌មានដែលពាក់ព័ន្ធនឹងបញ្ហាប្រឈមនៅតាមមូលដ្ឋានរបស់ពួកគាត់ ពិសេសក្នុងស្ថានភាពដែលកម្ពុជាកំពុងទទួលរងឥទ្ធិពលគ្រោះរាំងស្ងួត។
សម្តេចក្រឡាហោម មានប្រសាសន៍បែបនេះក្នុងឱកាសអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៨ លើកទិសដៅការងារឆ្នាំ២០១៩ របស់រដ្ឋបាលខេត្តបាត់ដំបង នៅព្រឹកថ្ងៃព្រហស្បតិ៍ ៩រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែកុម្ភៈ ឆ្នាំ២០១៩។ សម្តេចក្រឡាហោម បានលើកឡើងបន្ថែមថា ចំពោះដំណើរការអនុវត្តគោលនយោបាលវិមជ្ឈការ និងវិសហមជ្ឈការ នៅឆ្នាំ២០១៩ និង២០២០ រាជរដ្ឋាភិបាលត្រូវធ្វើឲ្យសម្រេចនូវកិច្ចការអាទិភាព៣ រួមមានទី ១ការផ្ទេរមុខងារ និងធនធានពីថ្នាក់ជាតិទៅថ្នាក់ក្រោមជាតិ ទី២ការផ្ទេរបុគ្គលិក ពីថ្នាក់ជាតិទៅថ្នាក់ក្រោមជាតិ និងការកែទម្រង់រចនាសម្ព័ន្ធ ការគ្រប់គ្រងរដ្ឋបាលក្រុងស្រុក។ ជាងនេះទៅទៀត ការងារដោះស្រាយទំនាស់នៅតាមមូលដ្ឋាន ពិសេសទំនាស់ដីធ្លី ថ្នាក់ដឹកនាំ និងអាជ្ញាធរទាំងអស់ ត្រូវប្រកាន់ខ្ជាប់គោលការណ៍យុត្តិធម៌ បញ្ចៀសឲ្យបាននូវការប្រើអំពើហិង្សា ពោលគឺធ្វើយ៉ាងណាឲ្យពលរដ្ឋមើលមកឃើញថាអាជ្ញាធរមិនមានភាពលម្អៀង។ សម្តេច ក្រឡាហោម ស ខេង ក៏បានមានប្រសាសន៍ដល់ការបំពេញការងាររបស់អាជ្ញាធរមូលដ្ឋាន ដែលមន្រ្តីរាជការសាធារណៈ ត្រូវតែចៀសវាងដាច់ខាត ការយកមធ្យោបាយរដ្ឋ បំរើឲ្យបក្ស ឬបុគ្គលផ្ទាល់ខ្លួន ហើយត្រូវបែងចែកឲ្យបានច្បាស់លាស់រវាងការងារបក្ស និងការងាររដ្ឋ និងសម្រាប់ការងាររដ្ឋ គឺមិនត្រូវប្រកាន់និន្នាការ ឬបក្សពួកឡើយ។
ដោយឡែកចំពោះបញ្ហាគ្រឿងញៀន សម្តេចក្រឡាហោម បញ្ជាក់យ៉ាងច្បាស់ថា មិនត្រូវរង់ចាំទាល់តែមានបទបញ្ជានោះទេ ពីព្រោះកម្ពុជាមានច្បាប់គ្រឿងញៀន និងមានគោលការណ៍ណែនាំពាក់ព័ន្ធរួចអស់ហើយ ដូច្នេះត្រូវតែដាក់វិធានការណ៍ទប់ស្កាត់ និងលុបបំបាត់ឲ្យបាននូវបញ្ហាដែលនាំឲ្យប៉ះពាល់អនាគតយុវជន និងសន្តិសុខសាធារណៈនេះ៕ គឹមអាន
ដោយៈ នាយកដ្ឋានព័ត៌មានវិទ្យា