ក្នុងដំណើរទស្សនកិច្ចរយៈពេល៤ថ្ងៃនៅសាធារណរ រដ្ឋកូរ៉េខាងត្បូង កាលពីថ្ងៃទី ១៩ ដល់ថ្ងៃទី ២២ ខែ កុម្ភៈ ឆ្នាំ ២០១៩ ឯកឧត្ដមនាយឧត្ដមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក.) បានដឹកនាំគណៈប្រតិភូទៅបំពេញទស្សនកិច្ចនៅសាធារណរដ្ឋកូរ៉េ។
ឯកឧត្ដមនាយឧត្ដមសេនីយ៍ និងគណៈប្រតិភូ បានចូលជួប ជាមួយលោក យ៉ាង ជីន យុង (Yang Jin Young ) នាយកស៊ើបអង្កេត និងស្រាវជ្រាវ នៃក្រសួងសុវត្ថិភាពចំណីអាហារ និងឱសថនៃសាធារណរដ្ឋកូរ៉េ ដោយនៅក្នុងជំនួបនោះភាគីទាំងពីរ កម្ពុជា-កូរ៉េ បានផ្លាស់ប្តូរចំណេះដឹង និងបទពិសោធន៍អំពីស្ថានភាពដែលពាក់ព័ន្ធនឹងសុវត្ថិភាពចំណីអាហារ និងឱសថក្នុងប្រទេសរបស់ខ្លួន ជាពិសេសបញ្ហាដែលពាក់ព័ន្ធនឹងកង្វះសុវត្ថិភាព ដែលបណ្ដាលមកពីគ្រឿងឧបភោគបរិភោគ ឱសថ និងគ្រឿងសំអាងក្លែងក្លាយ ខូចគុណភាព និងរំលោភកម្មសិទ្ធិបញ្ញា។ បន្ថែមពីលើនេះ ភាគីទាំងពីរ បានសន្យាថានឹងធ្វើកិច្ចសហប្រតិបត្តិការជាមួយគ្នាលើវិស័យប្រយុទ្ធប្រឆាំងបទល្មើសផលិតផលក្លែងក្លាយ និងរំលោភកម្មសិទ្ធិបញ្ញា ដែលមានលក្ខណៈឆ្លងដែន ក៏ដូចជាបទល្មើសរំលោភលើម៉ាកយីហោល្បីៗ នៃផលិតផលគ្រឿងសំអាង របស់សាធារណរដ្ឋកូរ៉េផងដែរ។
ជាកិច្ចបន្ត ឯកឧត្ដម នាយឧត្ដមសេនីយ៍ និងគណៈប្រតិភូ បានទៅទស្សនកិច្ចនៅស្នងការដ្ឋាននគរបាលក្រុងសេអ៊ូល ដោយបានជួបសំណេះសំណាលជាមួយលោក ជុង ជីអ៊ីល (Jung Ji Il) នាយកស៊ើបការ នៃទីភ្នាក់ងារនគរបាលក្រុងសេអ៊ូល ដោយលោកបានធ្វើការរាយការណ៍ជូនគណៈប្រតិភូកម្ពុជាអំពីបច្ចេកទេសក្នុងការតាមដាន ស៊ើបអង្កេត បង្រ្កាប និងធ្វើកោសល្យវិច័្ចយ បទល្មើសរបស់នគរក្រុងសេអ៊ូល ។ ជាមួយគ្នានោះ គណៈប្រតិភូកម្ពុជាក៏បានស្នើសុំកិច្ចសហប្រតិបត្តិការពីសំណាក់ស្ថាប័ននគរបាលក្រុងសេអ៊ូល ពាក់ព័ន្ធនឹងការស៊ើបអង្កេត និងបង្រ្កាបបទល្មើសនេះផងដែរ។ ជាងនេះទៅទៀត ឯកឧត្ដម នាយឧត្ដមសេនីយ៍ មៀច សុផាន់ណា ក៏បានស្នើសុំឲ្យស្ថាប័ននគរបាលសាធារណរដ្ឋកូរ៉េ តាមរយៈស្នងការដ្ឋាននគរបាលក្រុងសេអ៊ូល បើកជាវគ្គបណ្ដុះបណ្ដាល និងបំពាក់បំប៉ននូវបច្ចេកទេសជំនាញ ដល់មន្រ្តីនគរបាល នៃ គ.ប.ផ.ក. ក្នុងការតាមដាន និងបង្រ្កាបបទល្មើសផលិតផលក្លែងក្លាយ និងខុសច្បាប់ ហើយក៏បានស្នើសុំជំនួយឧបត្ថម្ភផ្នែកសម្ភារៈ ដែលជំនួយដល់ការធ្វើកោសល្យវិច្ច័យលើវត្ថុតាងផងដែរ។
ប្រតិភូកម្ពុជា ដែលដឹកនាំដោយ ឯកឧត្ដម នាយឧត្ដមសេនីយ៍ មៀច សុផាន់ណា ក៏បានសំណេះសំណាលជាមួយប្រធានសមាគមន៍ប្រយុទ្ធប្រឆាំងគ្រឿងញៀន និងមជ្ឈមណ្ឌលស្តានីតិសម្បទារអ្នកប្រើប្រាស់គ្រឿងញៀន នៃសាធារណរដ្ឋកូរ៉េ ដោយមជ្ឈមណ្ឌលបានបង្ហាញពីចំណាប់អារម្មណ៍របស់ខ្លួនក្នុងការកសាងនូវមជ្ឈមណ្ឌលស្តានីតិសម្បទានសម្រាប់អ្នកញៀនថ្នាំមួយកន្លែងក្នុងព្រះរាជាណាចក្រកម្ពុជា។ នាយឧត្តមសេនីយ៍ បានសន្យានឹងពាំនាំគំនិតផ្តួចផ្តើមនេះមក សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីពិនិត្យអំពីកាលានុវត្តភាពនៃគម្រោង ដែលបានស្នើឡើងដោយភាគីកូរ៉េមួយនេះ។
គណៈប្រតិភូកម្ពុជា ក៏បានទៅទស្សនកិច្ច នៅរោងចក្រផលិតគ្រឿងសំអាងម៉ាកល្បីៗរបស់សាធារណរដ្ឋកូរ៉េ ដូចជា JAYJUN, AVON, COREANA, ELENSILIA, KIEHL’S ជាដើម នឹងបានស្នើសុំកិច្ចសហការពីសំណាក់រោងចក្រទាំងនោះដែលជាម្ចាស់ម៉ាកដើម នៃផលិតផលគ្រឿងសំអាង ជួយធ្វើការវិភាគ តាមរយៈមន្ទីរពិសោធន៍របស់ខ្លួន លើផលិតផលដែល គ.ប.ផ.ក. បង្រ្កាប និងរឹបអូសបានក្នុងព្រះរាជាណាចក្រកម្ពុជា ហើយដែលសង្ស័យថាក្លែងក្លាយ និងរំលោភលើកម្មសិទ្ធិបញ្ញា នៃផលិតផលល្បីល្បាញទាំងនោះ៕ គឹមអាន
ប្រភព៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ