ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានស្នើសុំឱ្យថ្នាក់ដឹកនាំក្រសួង ស្ថាប័ន អង្គភាពពាក់ព័ន្ធដែលជាសមាជិក អាជ្ញាធរជាតិប្រយុទ្ធប្រឆាំងគ្រឿងញៀន ពិសេសគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន ត្រូវយកចិត្តទុកដាក់ចំនុច៦ ជាសំខាន់ ដើម្បីជំរុញការងារការព្យាបាល និងស្តារនីតិសម្បទាអ្នកញៀនគ្រឿងញៀន ទទួលបានប្រសិទ្ធភាព និងភាពជោគជ័យក្នុងសកម្មភាពរបស់អង្គភាពទាំងអស់។
នៅក្នុងអង្គសិក្ខាសាលាស្តីពីការព្យាបាល និងស្តារនីតិសម្បទាអ្នកញៀនគ្រឿងញៀន នាល្ងាចថ្ងៃ២១ ខែកុម្ភះ ឆ្នាំ២០១៩ នៅទីស្តីការក្រសួងសុខាភិបាល ឯកឧត្តម នាយឧត្តមសេនីយ៍កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានស្នើសុំ អង្គភាពពាក់ព័ន្ធ ពិសេសគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀនយកចិត្តទុកដាក់លើចំនុចសំខាន់ៗរួមមាន៖
ទី១. គណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន គួររៀបចំផែនការសម្រាប់ការងារព្យាបាល និងស្តារនីតិសម្បទា ឱ្យបានច្បាស់លាស់ ពិសេសរៀបចំឯកសារគោលសំខាន់ៗ និងចាំបាច់នានា ដើម្បីធានាថា ការផ្តល់សេវាព្យាបាល និងស្តារនីតិសម្បទាអ្នកញៀនគ្រឿងញៀន មានលក្ខណៈពហុវិស័យ និងជាប្រព័ន្ធ ហើយគ្រប់ក្រសួង ស្ថាប័ន អង្គភាពជាសមាជិក និងគណៈកម្មាធិការត្រួតពិនិត្យគ្រឿងញៀនរាជធានីខេត្ត ចូលរួម និងទទួលខុសត្រូវ អនុវត្តឱ្យបានស៊ីសង្វាក់គ្នា និងឱ្យបានជាប្រចាំ ។
ទី២. ក្រសួង ស្ថាប័ន អង្គភាពជាសមាជិកគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន និងគណៈកម្មាធិការត្រួតពិនិត្យគ្រឿងញៀនរាជធានី-ខេត្តទាំងអស់ ត្រូវយកចិត្តទុកដាក់ និងអនុវត្តទៅតាមតួនាទី និងការទទួលខុសត្រូវរបស់ខ្លួន ។
ទី៣.ពាក់ព័ន្ធនឹងទិន្នន័យ សូមគណៈកម្មាធិការទទួលការងារព្យាបាល និងស្តារនីតិសម្បទាអ្នកញៀនគ្រឿងញៀន ចាត់ចែង ពិនិត្យ និងកែសម្រួលបន្តទៀត ពិសេសរៀបចំឱ្យមានប្រព័ន្ធ និងវិធីសាស្រ្តច្បាស់លាស់ ដែលមានការទទួលស្គាល់ជាអន្តរជាតិ (ក្នុងពេលថ្មីៗនេះ ក្រសួងសុខាភិបាល និងដៃគូ បានសាកល្បងប្រើប្រាស់ប្រព័ន្ធគ្រប់គ្រងទិន្នន័យអ្នកញៀនគ្រឿងញៀនតាមបច្ចេកវិទ្យាទំនើប គឺតាមរយៈផ្តិតមេដៃលើអេក្រង់ទូរស័ព្ទ ដែលមានកត់ត្រាទិន្ន័យរបស់អ្នកជំងឺ ។ បើពិនិត្យទៅឃើញថា ល្អ ហើយយើងអាចមានលទ្ធភាព យើងគួរប្រើប្រាស់ប្រព័ន្ធនេះ) ។ ជាមួយនេះ គួរធ្វើកាបណ្តុះបណ្តាលឱ្យបានដល់គ្រប់អ្នកពាក់ព័ន្ធទាំងអស់ ដើម្បីឱ្យពួកគាត់បានយល់ដឹង និងចេះប្រមូល វិភាគ រក្សាទុក និងបញ្ជូនទិន្នន័យដែលមានលក្ខណៈត្រឹមត្រូវ អាចធ្វើជាមូលដ្ឋានសម្រាប់ការអនុវត្តការងាររបស់យើងឱ្យកាន់តែមានប្រសិទ្ធភាព ។
ទី៤. អាជ្ញាធរមូលដ្ឋាន ត្រូវយកចិត្តទុកដាក់បន្ថែមទៀត ព្រោះថា មានតែមូលដ្ឋាននេះហើយ ដែលដឹងច្បាស់អំពីបញ្ហាដែលកើតមានឡើងនៅក្នុងមូលដ្ឋានរបស់ខ្លួន ។ សូមសហការគ្នាឱ្យបានល្អជាមួយមន្រ្តី អនុវត្តច្បាប់ ដើម្បីធ្វើការផ្សព្វផ្សាយឱ្យកាន់តែយល់ដឹងអំពីការផ្តល់សេវាព្យាបាល និងស្តារនីតិសម្បទាអ្នកញៀនគ្រឿងញៀន ធ្វើសកម្មភាពបំផុសឱ្យមានការស្ម័គ្រចិត្ត តាមរយៈការលើកទឹកចិត្ត ការអប់រំណែនាំ ហើយក្នុងករណីចាំបាច់ អាចអនុវត្តច្បាប់ដើម្បីជម្រុញឱ្យទៅទទួលយកការព្យាបាល និងស្តារនីតិសម្បទា គឺ មិនត្រូវទុកឱ្យពួកគាត់នៅបន្តប្រើប្រាស់គ្រឿងញៀននៅក្នុងមូលដ្ឋានឡើយ ។
ទី៥. ស្នើសុំដល់ដៃគូពាក់ព័ន្ធ និងវិស័យឯកជន សូមបន្តចូលរួមជាមួយអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីផ្តល់ការព្យាបាល និងស្តារនីតិសម្បទាដល់អ្នកញៀនគ្រឿងញៀន និងបន្តយកចិត្តទុកដាក់បន្ថែមទៀតលើការអនុវត្តឱ្យបានត្រឹមត្រូវទៅតាមគោលណែនាំនានាដែលបានដាក់ចេញដោយគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន ដើម្បីធានាថា ការផ្តល់សេវារបស់យើងមានលក្ខណៈត្រឹមត្រូវទៅបទដ្ឋានបច្ចេកទេសទាំងផ្នែកច្បាប់ និងផ្នែកវេជ្ជសាស្រ្ត ហើយគោរពបាននូវសិទ្ធ និងផលប្រយោជន៍ផ្សេងៗរបស់អ្នកជំងឺ។
ទី៦. ស្នើសុំដល់ភាគីមិត្តថៃ និងវៀតណាម ក៏ដូចជាសប្បុរសជន ភ្នាក់ងារអង្គការសហប្រជាជាតិ ដូចជា UNODC, WHO, UNAIDS Aids Care China ។ល។ ឱ្យពិនិត្យលទ្ធភាពក្នុងការជួយជាបន្តទៀត ទាំងលើការងារពង្រឹងសមត្ថភាពមន្រ្តីពាក់ព័ន្ធ ក៏ដូចជាការកសាងហេដ្ឋារចនាសម្ព័ន្ធ សម្ភារ បច្ចេកទេស ដើម្បីឱ្យការផ្តល់សេវាព្យាបាល និងស្តារនីតិសម្បទាអ្នកញៀនគ្រឿងញៀននៅកម្ពុជាកាន់តែមានប្រសិទ្ធភាពថែមទៀត៕ គឹមអាន
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន