ក្រោយជំនួបរវាង សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ជាមួយ ឯកឧត្តម Amphay Kindavong ឯកអគ្គរដ្ឋទូតឡាវ នាទីស្តីការក្រសួងមហាផ្ទៃនារសៀលថ្ងៃព្រហស្បតិ៍ ១១រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣១ ខែមករា ឆ្នាំ២០១៩ ឯកឧត្តម ផាត សុផានិត អ្នកនាំពាក្យរងក្រសួងមហាផ្ទៃ បានមានប្រសាសន៍ថា ទោះជាក្នុងរយៈកាលកន្លងមកកិច្ចសហប្រតិបត្តិការរវាងព្រះរាជាណាចក្រកម្ពុជា និងសាធារណរដ្ឋប្រជាមានិតឡាវជួបនូវបញ្ហាប្រឈមមួយចំនួនយ៉ាងណាក៏ដោយ ប៉ុន្តែទោះជាយ៉ាងនេះក្តីក៏ប្រទេសទាំងពីរព្យាយាមដោះស្រាយបញ្ហារួមគ្នាប្រកបដោយស្មារតីមិត្តភាព និងដោយសន្តិវិធីក្នុងនាមជាប្រទេសជិតខាងនិងគ្នា។ ឯកឧត្តមបន្តថា ក្នុងឆ្នាំ២០១៩នេះដែរ ក្រសួងមហាផ្ទៃកម្ពុជានឹងត្រៀមខ្លួនធ្វើជាម្ចាស់ផ្ទះរៀបចំកិច្ចប្រជុំប្រចាំឆ្នាំជាមួយក្រសួងសន្តិសុខសាធារណឡាវ ដែលកិច្ចប្រជុំនេះក៏ជាផ្នែកមួយក្នុងការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យសន្តិសុខអោយកាន់តែខ្លាំងក្លា ល្អប្រសើរ និងកាន់តែជិតស្និតបន្ថែមទៀត៕គឹមអាន
ដោយ៖ នាយដ្ឋានព័ត៌មានវិទ្យា
