នៅព្រឹកថ្ងៃច័ន្ទ ០៨រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែមករា ឆ្នាំ២០១៩ ឯកឧត្តម សន្តិបណ្ឌិត ម៉ៅ ប៊ុនណារិន រដ្ឋលេខាធិការក្រសួងមហាផ្ទៃ បានអញ្ជើញដឹកនាំប្រជុំពិភាក្សាលើការងារកសាងប្រព័ន្ធទិន្នន័យនិងសេវាកម្មព័ត៌មានបច្ចេកទេសអន្តោប្រវេសន៍ ជាមួយឯកឧត្តម ជូ វិជិត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងអគ្គនាយកអាកាសចរណ៍ស៊ីវិល និងឯកឧត្តម អគ្គនាយករង នៃអគ្គនាយកដ្ឋានអន្តោប្រវេសន៍ ព្រមទាំងតំណាងក្រុមហ៊ុន សៅអ៉ីស្ត អេស៊ា ដាតាធិចណូឡូជី (South East Asia Data Technologies.Ltd)។
កិច្ចប្រជុំនេះ ធ្វើឡើងដើម្បីអនុវត្តគោលការណ៍សម្រេចរបស់រាជរដ្ឋាភិបាលក្នុងការអនុវត្តប្រព័ន្ធទទួលព័ត៌មានអ្នកដំណើរមុនពេលមកដល់ (APIS) និងប្រព័ន្ធទិន្នន័យបច្ចេកវិទ្យាគ្រប់គ្រងជនបរទេសអន្តោប្រវេសន្ត និងជនបរទេសស្នាក់នៅតាមសណ្ឋាគារ ផ្ទះសំណាក់ និងទីតាំងផ្តល់សេវាប្រហាក់ប្រហែល៕មុនីរម្យ
ដោយ៖ នាយកដ្ឋានព័ត៌មានវិទ្យា