នៅព្រឹកថ្ងៃសុក្រ ៥រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែមករា ឆ្នាំ២០១៩ ឯកឧត្តម សន្តិបណ្ឌិត ខៀវ សុភ័គ រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ប្រកាសចូលកាន់មុខតំណែងមន្រ្តីរាជការ និងបំពាក់ឋានន្តរស័ក្តិជូនមន្រ្តីនគរបាលជាតិ នៃអគ្គលេខាធិការដ្ឋាន ក្រសួងមហាផ្ទៃ នាទីស្តីការក្រសួង។ ព្រមជាមួយគ្នានោះ ក៏មានការអញ្ជើញចូលរួមពី អនុរដ្ឋលេខាធិការ ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ អគ្គលេខាធិការរង ថ្នាក់ដឹកនាំនាយកដ្ឋានចំណុះអគ្គលេខាធិការដ្ឋាន និងមន្រ្តីនគរបាលជាតិ ព្រមទាំងមន្រ្តីរដ្ឋបាលស៊ីវិលប្រមាណ ២១០រូបផងដែរ។
ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ បានមានប្រសាសន៍ស្វាគមន៍ថា ផ្តើមចេញពីការដឹកនាំដ៏ត្រឹមត្រូវ ឈ្លាសវៃ និងប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា និងការគ្រប់គ្រងដឹកនាំប្រកបដោយព្រហ្មវិហារធម៌របស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានជំរុញទឹកចិត្តមន្រ្តីគ្រប់ថ្នាក់នៃអគ្គលេខាធិការដ្ឋាន ឲ្យខិតខំបំពេញការងារដោយមិនខ្លាចនឿយហត់ក្នុងស្មារតី និងឆន្ទៈគាំទ្រយ៉ាងមុតមាំនូវគោលនយោបាយ គោលការណ៍ វិធានការ និងផែនការទាំងឡាយ ដែលរាជរដ្ឋាភិបាល និងក្រសួងមហាផ្ទៃបានដាក់ចេញ។ ឯកឧត្តមបន្តថា ផ្អែកលើឆន្ទៈការងារ និងសមិទ្ធផល ស្នាដៃដែលសម្រេចបានថ្នាក់ដឹកនាំ និងមន្រ្តីគ្រប់ថ្នាក់នៃអគ្គលេខាធិការដ្ឋានទាំងនគរបាលជាតិ និង រដ្ឋបាលស៊ីវិល មានមោទនភាពក្រៃលែងដោយទទួលបាននូវការលើកទឹកចិត្ត តាមរយៈការផ្តល់នូវគ្រឿងឥស្សរិយយស មេដាយការងារ ការប្រគល់ភារកិច្ច តែងតាំងមុខដំណែងជាបន្តបន្ទាប់ ក្រោមការយកចិត្តទុកដាក់ និងប្រគល់សេចក្តីទុកចិត្តដោយព្រះមហាក្សត្រ រាជរដ្ឋាភិបាល និងក្រសួងមហាផ្ទៃ។
ឯកឧត្តម សន្តិបណ្ឌិត ខៀវ សុភ័គ រដ្ឋលេខាធិការក្រសួងមហាផ្ទៃ មានប្រសាសន៍ថា ពិធីប្រកាសចូលកាន់មុខតំណែងមន្រ្តីរាជការ និងបំពាក់ឋានន្តរស័ក្តិនាពេលនេះ គឺបានបញ្ជាក់ពីលទ្ធផលនៃការខិតខំប្រឹងប្រែង របស់មន្រ្តីរបស់យើង និងបានបង្ហាញពីការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ថ្នាក់ដឹកនាំ ក្រសួងមហាផ្ទៃ និងអគ្គលេខាធិការដ្ឋាន ចំពោះមន្រ្តីដែលមានស្នាដៃ និងសម្រេចជោគជ័យរាល់គ្រប់ភារកិច្ច ដែលថ្នាក់ដឹកនាំប្រគល់ជូន។ ឯកឧត្តមបានវាយតម្លៃខ្ពស់ចំពោះថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ ទាំងនគរបាលជាតិ និងរដ្ឋបាលស៊ីវិល នៃអគ្គលេខាធិការដ្ឋាន ដែលកន្លងមកបានខិតខំប្រឹងប្រែងបំពេញភារកិច្ចប្រកបដោយការទទួលខុសត្រូវ និងឈ្លាសវៃ ហើយសម្រេចបានស្នាដៃធំៗជាច្រើន និងផែនការទាំងឡាយដែលរាជរដ្ឋាភិបាល និងក្រសួងមហាផ្ទៃ បានប្រគល់ជូន។
សូមបញ្ជាក់ថា នាយនគរបាលជាតិចំនួន ១០រូប ត្រូវបំពាក់ឋានន្តរស័ក្តិថ្នាក់ជាឧត្តមសេនីយ៍ឯក, នាយនគរបាលជាតិចំនួន ០៥រូប ត្រូវបំពាក់ឋានន្តរស័ក្តិថ្នាក់ជាឧត្តមសេនីយ៍ទោ, និងនាយនគរបាលជាតិចំនួន០៤រូប ត្រូវបំពាក់ឋានន្តរស័ក្តិថ្នាក់ជាឧត្តមសេនីយ៍ត្រី ដោយឡែកនាយនគរបាលជាតិ និងមន្រ្តីរដ្ឋបាលស៊ីវិលចំនួន០៦ ត្រូវបានប្រកាសអោយចូលកាន់មុខតំណែងនាព្រឹកនេះ៕គឹមអាន
ដោយ៖ នាយកដ្ឋានព័ត៌មានវិទ្យា