ឯកឧត្តម សន្តិបណ្ឌិត ខៀវ សុភ័គ រដ្ឋលេខាធិការក្រសួងមហាផ្ទៃ បានមានប្រសាសន៍ជម្រុញដល់នាយនគរបាល នាយនគរបាលជាន់ខ្ពស់ និងមន្ត្រីរាជការស៊ីវិល នៃអគ្គលេខាធិការដ្ឋានក្រសួងមហាផ្ទៃទាំងអស់ ត្រូវបន្តធ្វើយ៉ាងណាពង្រឹងប្រសិទ្ធភាពការងារឲ្យទទួលបានលទ្ធផលកាន់តែល្អប្រសើរ សំដៅចូលរួមសម្រេចបេសកម្មនៃការអនុវត្តយុទ្ធសាស្រ្តចតុកោណដំណាក់កាលទី៤ និងកម្មវិធីនយោបាយរបស់រាជរដ្ឋាភិបាល សម្រាប់នីតិកាលទី៦ នៃរដ្ឋសភា។ ឯកឧត្តមមានប្រសាសន៍បែបនេះ ក្នុងពិធីប្រកាសចូលកាន់មុខតំណែងមន្រ្តីរាជការ និងបំពាក់ឋានន្តរស័ក្តិមន្រ្តីនគរបាលជាតិ នៃអគ្គលេខាធិការដ្ឋានក្រសួងមហាផ្ទៃ នាព្រឹកថ្ងៃសុក្រ ៥រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែមករា ឆ្នាំ២០១៩ នៅទីស្តីការក្រសួងមហាផ្ទៃ។
ឯកឧត្តម សន្តិបណ្ឌិត បានបន្ថែមថា ថ្នាក់ដឹកនាំ និងមន្រ្តីគ្រប់ថ្នាក់ នៃអគ្គលេខាធិការដ្ឋាន ត្រូវបន្តយកចិត្តទុកដាក់អនុវត្តឲ្យបានពេញលេញប្រកបដោយឆន្ទៈមោះមុត និងស្មារតីទទួលខុសត្រូវខ្ពស់ ទាំងក្នុងការងារសេនាធិការជូនរដ្ឋមន្ត្រីក្រសួងមហាផ្ទៃ និងក្នុងតួនាទីភារកិច្ចនៃការទទួលខុសត្រូវរបស់ខ្លួន។ ឯកឧត្តមបន្តថា ថ្នាក់ដឹកនាំគ្រប់ថា្នក់ គ្រប់ផ្នែកទាំងអស់ត្រូវខិតខំប្រឹងប្រែងឲ្យអស់ពីលទ្ធភាព សមត្ថភាព និង ឆន្ទៈទៅតាមតួនាទី និងភារកិច្ចរៀងៗខ្លួន ដើម្បីបង្ហាញពីភាពស័ក្តិសមទៅនឹងការជឿទុកចិត្តរបស់រាជរដ្ឋាភិបាល ក្រសួងមហាផ្ទៃ និងអគ្គលេខាធិការដ្ឋាន ហើយត្រូវជៀសវាងដាច់ខាតនូវការយកតួនាទីនិងឋានន្តរស័ក្តិនេះ ទៅមប្រើផលប្រយោជន៍ផ្ទាល់ខ្លួន ឬប្រព្រឹត្តអំពើល្មើសច្បាប់ផ្សេងៗដែលផ្ទុយពីឆន្ទៈ និងបំណងរបស់រាជរដ្ឋាភិបាល ក្រសួងមហាផ្ទៃ និងអគ្គលេខាធិការដ្ឋាន។ ឯកឧត្តមបន្តទៀតថា ថ្នាក់ដឹកនាំ គ្រប់ថា្នក់ គ្រប់ផ្នែក ទាំងអស់ត្រូវយកចិត្តទុកដាក់គ្រប់គ្រងមន្រ្តីក្រោមឱវាទឲ្យបានល្អ ប្រកបដោយគុណធម៌ និងតម្លាភាព លើកកម្ពស់ការគោរពវិន័យ សីលធម៌ វិជ្ជាជីវៈ និងភាពស្មោះត្រង់។ ទន្ទឹមនឹងនោះ ត្រូវខិតខំជម្រុញមន្រ្តីក្រោមឱវាទឱ្យទទួលបានការបណ្តុះបណ្តាលគ្រប់គ្រាន់ ដើម្បីលើកកម្ពស់សមត្ថភាព ចំណេះដឹង និងបង្កើតទិន្នផលការងារ។ ជាមួយនេះ ថ្នាក់ដឹកនាំអគ្គលេខាធិការដ្ឋាន ក៏ត្រូវយកចិត្តទុកដាក់ធ្វើការត្រួតពិនិត្យ និងពង្រឹងការផ្គត់ផ្គង់មធ្យោបាយ សម្ភារបច្ចេកទេសឲ្យស្របតាមតម្រូវការរបស់អង្គភាពប្រតិបត្តិការផងដែរ។
ជាចុងបញ្ចប់ ឯកឧត្តមបានបញ្ជាក់ទៀតថា មន្រ្តីទាំងអស់ត្រូវខិតខំលើកកម្ពស់កិច្ចសហការល្អជាមួយក្រសួង ស្ថាប័ន រដ្ឋបាលថ្នាក់ក្រោមជាតិ និងអង្គភាពនានាចំណុះក្រសូងមហាផ្ទៃ ក្នុងការអនុវត្តនូវបណ្តាគោលការណ៍ វិធានការ និងផែនការការងារនានា ដែលរាជរដ្ឋាភិបាល និងក្រសូងមហាផ្ទៃបានដាក់ចេញ។ ជាងនេះទៅទៀត ឯកឧត្តម បានជម្រុញលើកទឹកចិត្តដល់មន្រ្តីដែលមានគុណសម្បត្តិ ស្នាដៃឆ្នើម មានសមត្ថភាពជំនាញ និងមានឆន្ទៈខ្ពស់ ក្នុងការអនុវត្តការងារ និងធ្វើការក្រើនរំលឹក ដាស់តឿន ហើយត្រូវដាក់ពិន័យចំពោះមន្រ្តីដែលមិនគោរពវិន័យ ការងារ អវត្តមាន ឬមានកំហុសឆ្គងខាងរដ្ឋបាល ដោយផ្អែកតាមលិខិតបទដ្ឋានគតិយុត្តជាធរមាន៕គឹមអាន
ដោយ៖ នាយកដ្ឋានព័ត៌មានវិទ្យា
