សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ នៅថ្ងៃអាទិត្យ ៤រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែតុលា ឆ្នាំ២០១៨នេះ បានផ្ញើសារថ្វាយព្រះពរ ព្រះករុណា ព្រះបាទ សម្ដេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសខួបលើកទី១៤ នៃការយាងគ្រងរាជសម្បត្តិរបស់ព្រះអង្គ។
តាមរយៈសារលិខិត សម្តេចក្រឡាហោម តាងនាមថ្នាក់ដឹកនាំមន្ត្រីរាជការស៊ីវិល និងនគរបាលជាតិកម្ពុជា នៃក្រសួងមហាផ្ទៃ បានចូលរួមថ្វាយព្រះសព្ទសាធុការពរជ័យ សិរីមង្គល បវរមហាប្រសើរគ្រប់យ៉ាង ប្រកបដោយកតញ្ញូកតវេទិតាធម៌យ៉ាងស្មោះស្ម័គ្របំផុត ចំពោះព្រះរាជព្រះមហាករុណាទិគុណ និងព្រះរាជព្រហ្មវិហារធម៌ ប្រកបដោយទសពិធរាជធម៌របស់ព្រះករុណាថ្លៃវិសេស ចំពោះជាតិមាតុភូមិ ប្រជានុរាស្រ្ត និងព្រះរាជសកម្មភាពដ៏ឧត្តុងឧត្តម ដែលជានិច្ចកាលព្រះអង្គតែងយកចិត្តទុកដាក់ខ្ពស់បំពេញព្រះរាជបេសកម្មដ៏ឧត្តុង្គឧត្តម ព្រមទាំងលះបង់កំលាំងព្រះកាយពល និងព្រះបញ្ញាញាណមិនខ្លាចនឿយហត់ ដើម្បីបុព្វហេតុមាតុភូមិ និងប្រជារាស្ត្រជាទីស្រឡាញ់របស់ព្រះអង្គ។ ប្រជារាស្ត្រខ្មែរគ្រប់ស្រទាប់ចងចាំមិនភ្លេចនូវព្រះរាជគុណូបការៈដ៏ថ្លៃថ្លាមិនអាចកាត់ថ្លៃបាន ដែលក្នុងបរមរាជសម្បត្តិរបស់ព្រះអង្គបាននាំមកនូវសន្តិភាព ស្ថេរភាព ការបង្រួបបង្រួមជាតិ និងភាពសុខដុមរមនាជូនប្រជារាស្ត្រខ្មែរទូទាំងប្រទេស។
សូមបញ្ជាក់ថា ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ត្រូវបានក្រុមប្រឹក្សារាជសម្បត្តិជ្រើសតាំងជាព្រះមហាក្សត្រនៃព្រះរាជាណាចក្រកម្ពុជា នាពីថ្ងៃទី២៩ ខែតុលា ឆ្នាំ២០០៤ បន្តពីព្រះបិតា ព្រះករុណា ព្រះបាទសម្ដេច ព្រះនរោត្ដម សីហនុ ដែលព្រះអង្គបានដាក់រាជ្យ នៅថ្ងៃ០៧ ខែតុលា ឆ្នាំ២០០៤៕ គឹមអាន
ដោយ៖ នាយកដ្ឋានព័ត៌មានវិទ្យា
ខាងក្រោមនេះជាខ្លឹមសារទាំងស្រុងនៃសារលិខិតរបស់សម្តេច៖
