នារសៀលថ្ងៃសុក្រ ០២រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៦ ខែតុលា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួមហាផ្ទៃ និងលោកជំទាវ ញ៉ែម សាខន ស ខេង ព្រមជាមួយថ្នាក់ដឹកនាំ មន្រ្តីក្រោមឱវាទក្រសួងមហាផ្ទៃ បានប្រារព្វពិធីសូត្រមន្ត បុណ្យកឋិនទាន នៅភូមិគ្រឹះសម្តេចក្រឡាហោមផ្ទាល់ នៅក្នុងពិធីនោះ បានរៀបចំពិធីនមស្សការព្រះរតនត្រ័យសមាទានសីល និមន្តព្រះសង្ឃចម្រើនព្រះបរិត្ត និងសម្តែងព្រះធម៌ទេសនា ដើម្បីផ្តល់ពរសព្វសាធុការជូនដល់ សម្តេចក្រឡាហោម និងថ្នាក់ដឹកនាំ មន្ត្រីទាំងអស់ផងដែរ។
សម្តេចក្រឡាហោម ស ខេង ផ្តួចផ្តើមបុណ្យកឋិនទាននេះឡើង ដើម្បីកៀរគរប្រមូលបច្ច័យ ដង្ហែវេរប្រគេនព្រះសង្ឃដែលគង់ចាំព្រះវស្សាអស់ត្រីមាសក្នុងពុទ្ធសីមា ទៅកាន់វត្តចំនួន ០៧ រួមមាន៖ វត្តសន្តិសុខារាម ហៅវត្តក្របៅថ្មី, វត្តក្របៅលិច, វត្តសុវណ្ណគង្គារ ហៅបឹងកេត, វត្តស្មោង, វត្តឧត្តមព្រៃធំ, វត្តទួលរវៀង និងវត្តពាមមង្គល។
សូមជំរាបដែរថា អង្គកឋិនទាននឹងដង្ហែចេញពីភូមិគ្រឹះ សម្តេចក្រឡាហោមទៅកាន់វត្តទាំង០៧ ខាងលើនាព្រឹកថ្ងៃ សៅរ៍ ទី២៧ ខែតុលា ឆ្នាំ២០១៨ វេលាម៉ោង០៧:៣០ព្រឹក។
សូមបញ្ជាក់ថា បុណ្យកឋិនទាន គឺជាពិធីបុណ្យប្រពៃណីព្រះពុទ្ធសាសនាមួយ ដែលប្រជាជនខ្មែរចាប់ផ្ដើមធ្វើបន្ទាប់ពីបុណ្យចេញវស្សា។ បុណ្យកឋិនតែងត្រូវបានដង្ហែចូលគ្រប់ទីអារាមទាំងអស់ចាប់ពីថ្ងៃ ១រោចខែអស្សុជដល់ថ្ងៃទី១៥កើត ខែកត្តិក គឺពុំមានវត្ដណាមួយត្រូវបានខកខានឡើយ៕ គឹមអាន
ដោយ៖ នាយកដ្ឋានព័ត៌មានវិទ្យា