នាព្រឹកថ្ងៃសុក្រ ៥រោច ខែផល្គុន ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៩ ខែមីនា ឆ្នាំ២០២៤ អគ្គលេខាធិការដ្ឋាន នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានរៀបចំកិច្ចប្រជុំបើកសវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ នៅអគ្គលេខាធិការដ្ឋាន គ.ជ.ប.ជ ក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង និង លោកជំទាវ ឧត្តមសេនីយ៍ឯក ប៉ុណ្ណ សំខាន់ អគ្គលេខាធិការ គ.ជ.ប.ជ ដោយមានការអញ្ជើញចូលរួមពី ឯកឧត្តម លោកជំទាវ អគ្គនាយករង គណៈប្រតិភូសវនកម្មផ្ទៃក្នុង អគ្គលេខាធិការរង ថ្នាក់ដឹកនាំ និងមន្ត្រីពាក់ព័ន្ធ។
ក្នុងឱកាសនេះ ឯកឧត្តម ឧត្តមសេនីយ៍ឯក អគ្គនាយក ថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងមន្ត្រីរាជការ នៃអគ្គលេខាធិការដ្ឋាន គ.ជ.ប.ជ ដែលបានចូលរួមសហការ និងជួយសម្របសម្រួលជាមួយ គណៈប្រតិភូសវនកម្មផ្ទៃក្នុង ដើម្បីរៀបចំកិច្ចប្រជុំនាពេលនេះប្រកបដោយភាពរលូន។
ឯកឧត្តម អគ្គនាយក មានមិតិលើកឡើងបន្តទៀតថា សម្រាប់កិច្ចប្រជុំបើកការងារសវនកម្មផ្ទៃក្នុង សម្រាប់ការិយបរិច្ឆេទ២០២៣ នៅអគ្គលេខាធិការដ្ឋាន គ.ជ.ប.ជ ត្រូវបានរៀបចំឡើងស្របតាមផែនការសកម្មភាពសវនកម្មប្រចាំឆ្នាំ របស់អគ្គនាយកដ្ឋានសវនកម្មផ្ទៃក្នុង និងដោយយោងតាមលិខិតបង្គាប់ការលេខ ១០៩ លបក ចុះថ្ងៃព្រហស្បតិ៍ ១២រោច ខែមាឃ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី០៧ ខែមីនា ឆ្នាំ២០២៤ របស់ក្រសួងមហាផ្ទៃ។
ជាមួយគ្នានេះដែរឯកឧត្តមក៏បានលើកឡើងអំពីតួនាទីភារកិច្ច ក្នុងកិច្ចប្រតិបត្តិការការងារសវនកម្មផ្ទៃក្នុង ដោយផ្តោតសំខាន់លើការពង្រឹងអភិបាលកិច្ច និងសុចរិតភាពនៃការ គ្រប់គ្រងបុគ្គលិក ការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ និងការគ្រប់គ្រងជនជាប់ឃុំ ព្រមទាំងការអភិវឌ្ឍសមត្ថភាពអង្គភាព ទាំងនៅថ្នាក់ជាតិ និងថ្នាក់ក្រោមជាតិ ដែលស្ថិតក្រោមដែនសមត្ថកិច្ច ក្រសួងមហាផ្ទៃ សំដៅរួមចំណែកពង្រឹងអភិបាលកិច្ចល្អ សន្តិសុខ សុវត្ថិភាព សណ្តាប់ធ្នាប់សង្គម និងការ អភិវឌ្ឍសេដ្ឋកិច្ចជាតិ។
ជាកិច្ចបញ្ចប់ ឯកឧត្តម ឧត្តមសេនីយ៍ឯក អគ្គនាយក បានថ្លែងអំណរគុណជូនចំពោះ លោកជំទាវ ឧត្តមសេនីយ៍ឯក អគ្គលេខាធិការ ដែលបានចំណាយពេលដ៏មានតម្លៃចូលរួមពិធីបើកសវនកម្មផ្ទៃក្នុងនាវេលានេះ និងសូមប្រសិទ្ធិពរជ័យជូន ឯកឧត្តម លោកជំទាវ គណៈអធិបតី ថ្នាក់ដឹកនាំគ្រប់លំដាប់ថ្នាក់ គ្រប់ផ្នែកពាក់ព័ន្ធទាំងអស់ សូមប្រកបដោយសេចក្តីសុខ សេចក្តីចម្រើន ជោគជ័យគ្រភារកិច្ច ព្រមទាំង ជួបប្រទះនូវពុទ្ធពរទាំង ៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមប្រកាសបើកកិច្ចសវនកម្ម សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ នៅអគ្គលេខាធិការដ្ឋាន គ.ជ.ប.ជ ក្រសួងមហាផ្ទៃ ចាប់ពីពេលនេះតទៅ៕
ប្រភព៖ អគ្គនាយកដ្ឋានសវនកម្មផ្ទៃក្នុង