បន្ទាប់ពីអង្គប្រជុំក្រុមការងាររៀបចំកសាងច្បាប់វិសោធនកម្មច្បាប់ស្ដីពីការបង្ក្រាបល្បែងស៊ីសង ដែលដឹកនាំដោយឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារ បានឯកភាពលើសេចក្តីព្រាងទស្សនាទាននៃរចនាសម្ព័ន្ធ និងគោលគំនិតសំខាន់ៗនៃសេចក្តីព្រាងច្បាប់ស្ដីពីវិសោធនកម្មច្បាប់ស្ដីពីការបង្ក្រាបល្បែងស៊ីសង កាលពីថ្ងៃទី១១ ខែមីនា ឆ្នាំ២០២៤ ឯកឧត្តម ទ្រី សុខហេង អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារបច្ចេកទេសកសាងសេចក្តីព្រាងច្បាប់នេះ បានបន្តដឹកនាំកិច្ចប្រជុំដើម្បីពិនិត្យ ពិភាក្សាតាក់តែងសេចក្តីព្រាងបទប្បញ្ញត្តិជាវិធានបទល្មើសល្បែងស៊ីសងខុសច្បាប់ នៃសេចក្តីព្រាងច្បាប់ស្ដីពីវិសោធនកម្មច្បាប់ស្ដីពីការបង្ក្រាបល្បែងស៊ីសង ប្រព្រឹត្តទៅកាលពីថ្ងៃទី១៨ ខែមីនា ឆ្នាំ២០២៤ ដោយមានការចូលរួមពីឯកឧត្តម អស់លោក ជាសមាជិកក្រុមបច្ចេកទេសផងដែរ ។
មុនបញ្ចប់កិច្ចប្រជុំ អង្គប្រជុំបានឯកភាពគ្នាកំណត់ពេលវេលា មួយសប្តាហ៍ប្រជុំពីរលើក ដោយមានគោលបំណង ដើម្បីពន្លឿនការរៀបចំតាក់តែងសេចក្តីព្រាងច្បាប់នេះ ឱ្យបានចប់សព្វគ្រប់តាមការកំណត់នៃពេលវេលាដែលបានគ្រោងទុក ៕
ដោយ ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ