ខេត្តត្បូងឃ្មុំ៖ ឯកឧត្តម កុល វីរក្ស រដ្ឋលេខាធិការក្រសួងមហាផ្ទៃ និងជាប្រធានក្រុមការងារត្រួតពិនិត្យ និងជំរុញការអនុវត្តគោលនយោបាយភូមិ ឃុំ សង្កាត់ មានសុវត្ថិភាពខេត្តត្បូងឃ្មុំ បានអញ្ជើញដឹកនាំកិច្ចប្រជុំត្រួតពិនិត្យការអនុវត្តគោលនយោបាយភូមិ ឃុំ សង្កាត់ មានសុវត្ថិភាព និងលទ្ធផលចលនាប្រឡងប្រណាំងអនុវត្តគោលនយោបាយភូមិ ឃុំ សង្កាត់ មានសុវត្ថិភាព ឆ្នាំ២០២៣ និងលើកទិសដៅឆ្នាំ២០២៤ ដោយមានការចូលរួមពីក្រុមការងារក្រសួងមហាផ្ទៃ គណៈបញ្ជាការឯកភាពរដ្ឋបាលខេត្ត មន្ទីរអង្គភាពជុំវិញខេត្ត ស្នងការដ្ឋាននគរបាលខេត្ត កងរាជអាវុធហត្ថខេត្ត រដ្ឋបាលក្រុង ស្រុក និងថ្នាក់ឃុំសង្កាត់ សរុបចំនួន២៥០រូប។
ថ្លែងក្នុងឱកាសនោះ ឯកឧត្តមរដ្ឋលេខាធិការក្រសួងមហាផ្ទៃ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អ្នកពាក់ព័ន្ធទាំងអស់ដែលជាប្រតិបត្តិករក្នុងការចូលរួមបំពេញតួនាទី ភារកិច្ចរបស់ខ្លួនក្នុងពេលកន្លងមក សម្រេចបានលទ្ធផលល្អប្រសើរគួរជាទីពេញចិត្ដ បើប្រៀបធៀបនឹងឆ្នាំ២០២២ កន្លងទៅ។ ឯកឧត្តម រដ្ឋលេខាធិការ ក៏បានធ្វើការណែនាំដល់គណៈបញ្ជាការឯកភាពរដ្ឋបាលខេត្តត្បូងឃ្មុំ បន្តពង្រឹងយន្តការលំហូរព័ត៌មាន ដើម្បីក្ដាប់ទិន្នន័យលើវិស័យគ្រប់គ្រងសន្តិសុខ សណ្ដាប់ធ្នាប់ និងសុវត្ថិភាពសាធារណៈ អោយបានកាន់តែល្អប្រសើរ៕
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ