នាព្រឹកថ្ងៃអង្គារ ១៣កើត ខែផល្គុន ឆ្នាំរកា នព្វស័ក ពស ២៥៦១ ត្រូវនឹងថ្ងៃទី២៧ ខែកុម្ភះ ឆ្នាំ២០១៨ នៅទីស្តីការក្រសួងមហាផ្ទៃ ឯកឧត្តម នាយឧត្តមសេនីយ៍ សន្តិបណ្ឌិត សុខ ផល អគ្គនាយក នៃអគ្គ នាយកដ្ឋានអន្តោប្រវេសន៍ អញ្ជើញបើកកិច្ចប្រជុំសន្និបាតបូកសរុបលទ្ធផល ការងារប្រចាំឆ្នាំ២០១៧ និងលើកទិសដៅការងារសម្រាប់អនុវត្តឆ្នាំ២០១៨។
សន្និបាតប្រចាំឆ្នាំ២០១៧ នេះ គឺមានគោលបំណងត្រួតពិនិត្យ និងវាយតម្លៃការងារដែលសម្រេចបាន ក្នុងឆ្នាំ២០១៧ ព្រមទាំងដាក់ផែនការការងារសម្រាប់ឆ្នាំ២០១៨ បន្តទៀត ដោយមានវត្តមានរបស់ ឯកឧត្តម រដ្ឋលេខាធិកា អនុរដ្ឋលេខាធិកា អគ្គស្នងការនគរបាលជាតិ អគ្គនាយក អគ្គនាយករង ពីបណ្តាក្រសួង ផ្សេងៗ ដែលពាក់ព័ន្ធ ព្រមទាំងមន្រ្តីនគរបាលអន្តោប្រវេសន៍ នៃអធិការដ្ឋាននគរបាលក្រុង ស្រុក ខណ្ឌ និងស្នងការនគរបាលរាជធានី ខេត្តផងដែរ។
ក្នុងឱកាសនោះដែរ ក៏មានបទអន្តរាគមន៍ពីស្នងការរងទទួលការងារអន្តោប្រវេសន៍រាជធានី ខេត្ត និងពិធីបំពាក់ឋាន្តរស័ក្តិជូននាយនគរបាលជាតិ ហើយប្រគល់សម្ភារកុំព្យូទ័រដល់ការិយាល័យស៊ើបនអង្កេត និងអនុវត្តនីតិវិធី និងផ្នែកអន្តោប្រវេសន៍ នៃអធិការដ្ឋាននគរបាលស្រុក ក្រុង ខណ្ឌ និងស្នងការនគរបាល រាជធានី ខេត្ត។
