កំពង់ធំ ៖ នៅថ្ងៃពុធ ទី០១ ខែមីនា ឆ្នាំ២០២៣ ឯកឧត្តម ឧត្តមសេនីយ៍ឯក លឹម ផាន់ភារៈ ប្រធាននាយកដ្ឋានកណ្តាលសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ អមដំណេីរដោយ ឯកឧត្តម អនុប្រធាននាយកដ្ឋានកណ្តាលសណ្តាប់ធ្នាប់សាធារណៈ ឯកឧត្តម ឧត្តមសេនីយ៍ឯក ប្រធាននាយកដ្ឋាននគរបាលទេសចរណ៍ លោកអនុប្រធាននាយកដ្ឋាននគរបាលការពារបេតិកភណ្ឌ និងមន្រ្តីក្រោមឱវាទ បានចុះត្រួតពិនិត្យទីតាំងឈរជេីង កន្លែងស្នាក់នៅ ហូបចុក និងបានជួបសំណេះសំណាលជាមួយកងកម្លាំងនគរបាលការពារបេតិកភណ្ឌ និងនគរបាលទេសចរណ៍ ប្រចាំតំបន់រមណីយដ្ឋានប្រាសាទសំបូរព្រៃគុក ខេត្តកំពង់ធំ។
ក្រោយពីបានស្តាប់នូវរបាយការណ៍ស្វាគមន៍ របស់លោកប្រធានអង្គភាពទាំង២ រួចមក ឯកឧត្តម ឧត្តមសេនីយ៍ឯក ប្រធាននាយកដ្ឋានកណ្តាល សណ្តាប់ធ្នាប់សាធារណៈ បានមានប្រសាសន៍កោតសរសេីរ និងវាយតម្លៃខ្ពស់ចំពោះកិច្ចខិតខំប្រឹងប្រែងយកចិត្តទុកដាក់បំពេញភារកិច្ចប្រកបដោយស្មារតីទទួលខុសត្រូវខ្ពស់របស់បងប្អូនមន្រ្តីនគរបាលជាតិទាំង២អង្គភាព។ ទន្ទឹមនោះ ឯកឧត្តម ឧត្តមសេនីយ៍ឯក ក៏បានផ្តល់អនុសាសន៍ដល់ប្រធានអង្គភាពទាំង២ ត្រូវបង្កេីនកិច្ចសហការគ្នាឱ្យបានល្អប្រសេីរក្នុងនាមជាមន្រ្តីនគរបាលជាតិដូចគ្នា និងជាអង្គភាពនៅក្រោមដំបូលតែមួយ របស់នាយកដ្ឋានកណ្តាលសណ្តាប់ធ្នាប់សាធារណៈ នៃអគ្គស្នងការដ្ឋានគរបាលជាតិ។ ជាពិសេស ត្រូវចេះរៀបចំផែនការប្រតិបត្តិការ ផែនការល្បាតរួមគ្នា និងត្រូវពង្រឹងរបៀបរបបរាយការណ៍តាមឋានានុក្រម ដោយត្រូវរាយការណ៍ឱ្យបានជាប្រចាំ និងត្រូវរៀបចំផែនទីភូមិសាស្រ្ត ដេីម្បីបង្កេីនភាពងាយស្រួល ក្នុងការបំពេញភារកិច្ចប្រចាំថ្ងៃ និងដើម្បីបង្កភាពងាយស្រួលជូនដល់ភ្ញៀវទេសចរណ៍ជាតិ អន្តរជាតិ ដែលចូលមកទស្សនាក្នុងតំបន់រមណីយដ្ឋានធម្មជាតិ និងប្រាសាទបុរាណ។
មុននឹងបញ្ចប់ ឯកឧត្តម ឧត្តមសេនីយ៍ឯក លឹម ផាន់ភារៈ ក៏បានពាំនាំនូវប្រសាសន៍ផ្តាំសាកសួរសុខទុក្ខដោយក្តីនឹករលឹកពីសំណាក់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នៃអគ្គស្នងការដ្ឋាននគរបាលជាតិ និងបាននាំនូវថវិកាឧបត្ថម្ភរបស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន សម្រាប់ទ្រទ្រង់ដល់អង្គភាពទាំង២ ក្នុង១អង្គភាពចំនួន ២លានរៀលផងដែរ៕
ប្រភព៖ អគ្គស្នងការដ្ឋាននគរបាលជាតិ
