រសៀលថ្ងៃសុក្រ ៩កើត ខែផល្គុន ឆ្នាំរកា នព្វស័ក ពុទ្ធសករាជ ២៥៦១ ត្រូវនឹងថ្ងៃទី២៣ ខែកុម្ភៈ ឆ្នាំ២០១៨ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យ ឯកឧត្តម Nobushige TAKAMIZAWA ប្រធានសន្និសីទទី៤នៃរដ្ឋភាគីសន្ធិសញ្ញាជំនួញសព្វាវុធ(ATT)និងជាឯកអគ្គរដ្ឋទូត និងជាតំណាងអចិន្ត្រៃយ៍ជប៉ុនប្រចាំសន្និសីទ ស្តីពីការរំសាយសព្វាវុធនៅទីក្រុងGeneva ចូលជួបសម្តែងការគួរសម។
ក្នុងកិច្ចជំនួបនោះ ឯកឧត្តម Nobushige TAKAMIZAWA បានស្នើសុំសម្តេចក្រឡាហោម ឱ្យចាត់មន្ត្រីដែលសកម្មមាននៅក្នុងការងារនេះ និងមានចំណេះដឹង ជំនាញបច្ចេកទេស និងចេះគោលនយោបាយ ដើម្បីចូលរួមនៅក្នុងសន្និសីទដែលនឹងរៀបចំនាពេលខាងមុខ។
ជាការឆ្លើយតប សម្តេចក្រឡាហោម បានមានប្រសាសន៍ថា សម្តេចត្រៀមខ្លួនចាត់មន្ត្រីសកម្មការងារចូលរួមតាមការស្នើរបស់ឯកឧត្តម Nobushige និងសូមអំពាវនាវឱ្យអង្គការសហប្រជាជាតិ និងដៃគូពាក់ព័ន្ធផ្សេងៗ បន្តជួយគាំទ្រដល់កម្ពុជាក្នុងការសម្រេចឱ្យបាននូវកាតព្វកិច្ចផ្សេងៗក្នុងសន្ធិសញ្ញាជំនួញសព្វាវុធនេះ(ATT)៕
