នាព្រឹកថ្ងៃអង្គារ ទី៣១ ខែឧសភា ឆ្នាំ២០២២ នៅសាលប្រជុំរបស់អគ្គាធិការដ្ឋាន ឯកឧត្តម អ៉ីវ លាង អគ្គាធិការ នៃអគ្គាធិការដ្ឋានក្រសួងមហាផ្ទៃ ដឹកនាំកិច្ចប្រជុំពិភាក្សារបាយការណ៍ស្តីពីសកម្មភាពការងារប្រចាំខែឧសភា និងទិសដៅការងារខែមិថុនាឆ្នាំ២០២២របស់អគ្គាធិការដ្ឋាន ដែលកិច្ចប្រជុំនេះមានការចូលរួមពី អគ្គាធិការរង ប្រធាននាយកដ្ឋាន អនុប្រធាននាយកដ្ឋាន និងមន្ត្រីពាក់ព័ន្ធ។

ឯកឧត្តម អគ្គាធិការ បានស្នើឲ្យនាយកដ្ឋានជំនាញត្រួតពិនិត្យលើរបាយការណ៍នេះ និងពិនិត្យសេចក្ដីព្រាង សេចក្ដីណែនាំនានា ពាក់ព័ន្ធការអនុវត្តលិខិតបទដ្ឋានគតិយុត្តិឱ្យស្របតាមផែនការសកម្មភាពឆ្នាំ២០២២ ក្នុងត្រីមាសទី២របស់នាយកដ្ឋាន និងរបស់អគ្គាធិការដ្ឋាន។

ឆ្លៀតឱកាសនោះដែរ ឯកឧត្តម អគ្គាធិការ បានរំលឹកនាយកដ្ឋានជំនាញ ពិនិត្យ និងធ្វើបច្ចុប្បន្នភាពលើលិខិតបទដ្ឋានគតិយុត្តិផ្សេងៗ ដែលលែងមានសុពលភាព ឬក្នុងផែនការសកម្មភាពសម្រាប់ត្រីទី១ ឆ្នាំ២០២២ដែលមិនទាន់បានកែសម្រួល ត្រូវពន្លឿន ក្នុងត្រីមាសទី២ឬត្រីមាសបន្ទាប់ ត្រូវកែសម្រួល និងត្រៀមលក្ខណៈទុកជាមុន ព្រោះផែនការសកម្មភាព ជាផែនទីឬត្រីវិស័យជាមូលដ្ឋានសម្រាប់ការអនុវត្តសកម្មភាពការងាររបស់នាយកដ្ឋាន ក៏ដូចរបស់អគ្គាធិការដ្ឋាន ដែលបានដាក់ចេញរួចហើយ។

ចំពោះការងារកំពុងអនុវត្តឬមិនទាន់បានអនុវត្ត ត្រូវព្យាយាមកែសម្រួល និងតម្រង់ទិសឱ្យស្របតាមផែនការសកម្មភាពនេះ។ដោយឡែកសម្រាប់លិខិតបទដ្ឋាននានាកំពុងតែកែសម្រួល ឬបានគោលការណ៍អនុញ្ញាតពីថ្នាក់ដឹកនាំក្រសួងរួចហើយ ត្រូវពន្លឿនដើម្បីឱ្យស្របផែនការ និងឆ្លើយតបតម្រូវការការងារ៕

ប្រភព៖ អគ្គារធិការដ្ឋាន