នៅរសៀលថ្ងៃអង្គារ ទី១០ ខែឧសភា ឆ្នាំ២០២២នេះ សម្ដេចក្រឡាហោម ស ខេង នាយករដ្ឋមន្ត្រីស្តីទី និងជារដ្ឋមន្ត្រីក្រសួងមហាផ្ទៃ បានអញ្ជើញចូលរួមពិធីបុណ្យខួបគម្រប់៧ថ្ងៃ ឧទ្ទិសកុសលជូនដួងវិញ្ញាណក្ខន្ធសព សម្ដេចឧត្តមទេពញាណ ហ៊ុន ណេង អ្នកតំណាងរាស្ត្រមណ្ឌលកំពង់ចាម សមាជិកអចិន្ត្រៃយ៍រដ្ឋសភា និងជាប្រធានគណៈកម្មការទី៤នៃរដ្ឋសភា។

សម្ដេចឧត្តមទេពញាណ ហ៊ុន ណេង បានទទួលមរណភាពកាលពីថ្ងៃទី៥ ខែឧសភា ឆ្នាំ២០២២ ដោយរោគាពាធ ក្នុងជន្មាយុ៧២ឆ្នាំ។ ពិធីបុណ្យគ្រប់ខួប៧ថ្ងៃឧទ្ទិសកុសលជូនដួងវិញ្ញាណក្ខន្ធសពសម្ដេចឧត្តមទេពញាណបានប្រារព្ធឡើងនៅគេហដ្ឋានសម្ដេច និងលោកជំទាវ ស្ថិតក្នុងភូមិ៧ សង្កាត់កំពង់ចាម ក្រុងកំពង់ចាម ខេត្តកំពង់ចាម។

នាពេលប៉ុន្មានថ្ងៃមុននេះ សម្តេចក្រឡាហោម ស ខេង នាយករដ្ឋមន្ត្រីស្តីទី និងជារដ្ឋមន្ត្រីក្រសួងមហាផ្ទៃ ក៏បានផ្ញើសាររំលែកមរណទុក្ខជូនលោកជំទាវ លាវ វួចឆេង ហ៊ុន ណេង ដោយសម្ដេច បានគូស បញ្ជាក់ថា សម្ដេចឧត្តមទេពញាណ ហ៊ុន ណេង ជាកុលបុត្រខ្មែរដ៏ឆ្នើម និងជាវីរជន ប្រកបដោយស្មារតី និងឆន្ទៈស្នេហាជាតិដ៏មោះមុត មួយរូបដែលធ្លាប់បានបូជាកម្លាំងកាយ និងប្រាជ្ញាស្មារតី ពុះពារមិនខ្លាចនឿយហត់ចូលរួម ក្នុងបុព្វហេតុជាតិមាតុភូមិ និងប្រជាជន។

សម្ដេចក្រឡាហោមបានចាត់ទុកចំពោះមរណភាពសម្ដេចឧត្តមទេពញាណ ហ៊ុន ណេង ថាមិនត្រឹមតែជាការបាត់បង់នូវស្វាមី ឪពុក និងជីតា ជាទីគោរពស្រលាញ់ដ៏ជ្រាលជ្រៅពុំអាចរកអ្វីប្រៀបផ្ទឹមបានរបស់លោកជំទាវ  លាវ វួចឆេង និងក្រុមគ្រួសារប៉ុណ្ណោះទេ ប៉ុន្តែក៏ជាការបាត់បង់ដោយសេចក្ដីអាឡោះអាល័យជាទីបំផុត នូវឥស្សរជនជាន់ខ្ពស់មួយរូបដែរ។

លើសពីនេះទៀត សម្ដេចឧត្តមទេពញាណ តែងបម្រើយ៉ាងស្មោះស្ម័គ្រ ជាតិ សាសនា ព្រះមហាក្សត្រ ព្រមទាំងបានចូលរួមចំណែកបង្កើតសមិទ្ធផល និងស្នាដៃជាច្រើន រួមចំណែកក្នុងការស្តារ កសាង និងអភិវឌ្ឍសង្គមជាតិ អស់រយៈពេលជាច្រើនទសវត្សកន្លងមក រហូតដល់អវសាននៃជីវិត។

សម្ដេចក្រឡាហោម ស ខេង និងលោកជំទាវ ញ៉ែម សាខន ស ខេង និងក្រុមគ្រួសារ ព្រមទាំងថ្នាក់ដឹកនាំ និងមន្ត្រីក្រសួងមហាផ្ទៃ បានឧទ្ទិសបួងសួងជូនដួងវិញ្ញាណក្ខន្ធសពសម្ដេចឧត្តមទេពញាណ ហ៊ុន ណេង បានទៅកាន់ឋានបសុខក្នុងសុគតិភពកុំបីឃ្លៀងឃ្លាតឡើយ៕

ដោយ៖ នាយកដ្ឋានព័ត៌មានវិទ្យា