នាព្រឹកថ្ងៃព្រហស្បតិ៍ ទី២៨ ខែមេសា ឆ្នាំ២០២២ នៅសាលប្រជុំរបស់អគ្គាធិការដ្ឋាន ឯកឧត្តម អ៉ីវ លាង អគ្គាធិការ នៃអគ្គាធិការដ្ឋានក្រសួងមហាផ្ទៃ អញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រី យ៉េនឌ័រ របស់អគ្គាធិការដ្ឋាន ដោយមានការចូលរួមពី លោកជំទាវ អគ្គាធិការរង ឯកឧត្តម អគ្គាធិការរងទទួលផែននាយកដ្ឋានរដ្ឋបាល-សរុប ប្រធាននាយកដ្ឋានរដ្ឋបាល-សរុប អនុប្រធាននាយកដ្ឋាន ប្រធាន-នាយការិយាល័យ អនុប្រធាន-នាយរងការិយាល័យ នាយ-រងផ្នែក និងមន្ត្រីទាំងអស់ជានារី ចំណុះអគ្គាធិការដ្ឋាន។
ជាកិច្ចចាប់ផ្ដើម ឯកឧត្តម អគ្គាធិការ បានសម្តែងក្តីសោមនស្សរីករាយក្នុងឱកាសដែលអាចឱ្យយើងបានជួបជុំគ្នានៅពេលនេះ និងបានកោតសរសើរដល់ថ្នាក់ដឹកនាំ មន្ត្រីគ្រប់ផ្នែកចំណុះអង្គភាពអគ្គាធិការដ្ឋាន ជានារី ដែលបានខិតខំបំពេញការងារដោយការទទួលខុសត្រូវតាមតួនាទីភារកិច្ចរបស់ខ្លួនជាពិសេសក្នុងបរិបទការរីករាលដាលជំងឺកូវីដ-១៩នេះ មិនតែប៉ុណ្ណោះក្រៅពីការងារអង្គភាពហើយ នៅបំពេញតួនាទីជាភរិយា ជាម្តាយ ជាបង ជាប្អូន...។ល។ យកឱកាសនេះដែរ ឯកឧត្តម អគ្គាធិការ បានសំដែងការអរគុណ និងវាយតម្លៃខ្ពស់ចំពោះថ្នាក់ដឹកនាំអគ្គាធិការដ្ឋាន មន្ត្រីគ្រប់លំដាប់ថ្នាក់ គ្រប់ផ្នែកចំណុះអគ្គាធិការដ្ឋាន ដែលបានជម្រុញសកម្មភាពការងារក្នុងអគ្គាធិការដ្ឋានបានល្អប្រសើរក្នុងពេលកន្លងមក ដោយដៃម្ខាងខិតខំបំពេញការងារក្នុងស្មារតីទទួលខុសត្រូវចំពោះអង្គភាព ដៃម្ខាងទៀត ចូលរួមការពារ និងទប់ស្កាត់ជំងឺកូវីដ-១៩ជាមួយរាជរដ្ឋាភិបាល។
ក្នុងពេលជួបសំណេះសំណាលនេះដែរ ឯកឧត្តម អគ្គាធិការ បានមានប្រសាសន៍លើកទឹកចិត្តដោយជម្រុញ និងឱ្យបន្តខិតខំបំពេញការងារថែមទៀត ហើយការលើកទឹកចិត្តនោះគឺការផ្តល់ឱកាសជាអាទិភាព ក្នុងការតែងតាំងមុខតំណែងក្នុងរចនាសម្ព័ន្ធដែលមានស្រាប់ តាមរយៈការពិនិត្យវាយតម្លៃលើការអនុវត្តសកម្មភាពការងារជាក់ស្តែង តែមិនមែនការលើកទឹកចិត្តផ្តល់ឱ្យចំពោះមន្ត្រីអសកម្មនោះទេ ទោះជាមន្ត្រីនោះជានារីក៏ដោយ ។ ឯកឧត្តម អគ្គាធិការ បានមានប្រសាសន៍បន្តថា ការងារយ៉េនឌ័រ ការលើកទឹកចិត្តចំពោះមន្ត្រីជានារី ថ្នាក់ដឹកនាំក្រសួង ជាពិសេសសម្តេចក្រឡាហោម លោកតែងតែយកចិត្តទុកដាក់ និងមានមតិដឹកនាំជាបន្តបន្ទាប់។
ឆ្លៀតឱកាសនេះដែរ ឯកឧត្តម អគ្គាធិការ បានណែនាំក្រុមការងារយ៉េនឌ័ររបស់អគ្គាធិការដ្ឋានពិនិត្យរៀបចំផែនការសកម្មភាពការងាររបស់ខ្លួន និងជម្រុញបញ្ជ្រាបការងារយ៉េនឌ័រ។
ជាចុងក្រោយ ឯកឧត្តម អគ្គាធិការ បានសំដែងក្តីគោរពដ៏ខ្ពង់ខ្ពស់ និងសំដែងសេចក្តីអំណរគុណដ៏ជ្រាលជ្រៅជាទីបំផុតចំពោះសម្តេចក្រឡាហោម ដែលលោកតែងតែយកចិត្តទុកដាក់ចំពោះសុខទុក្ខរបស់មន្ត្រីក្រោមឱវាទ និងជាពិសេសមន្ត្រីជានារី ដោយបានឧបត្ថម្ភថវិកាក្នុងមួយម្នាក់ចំនួន១០០,០០០រៀលតាមរយៈអគ្គាធិការដ្ឋានផ្តល់ជូនក្នុងឱកាសជួបសំណេះសំណាលនេះ៕
ប្រភព៖ អគ្គាធិការដ្ឋាន