ជារៀងរាល់ឆ្នាំ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ញ៉ែម សាខន ស ខេង តែងតែចូលរួមបរិច្ចាគថវិកាជាមួយកាកបាទក្រហមកម្ពុជាក្នុងឱកាសខួបប្រចាំឆ្នាំ នៃទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីចូលរួមជាមួយយុទ្ធនាការផ្សេងៗរបស់ប្រមុខរាជរដ្ឋាភិបាល ព្រមទាំងកម្មវិធីសប្បុរសធម៌នានាជាច្រើនទៀត។

ជាក់ស្តែងនៅឆ្នាំ២០២២នេះផងដែរ សម្តេចក្រឡាហោម ស ខេង និងលោកជំទាវ ក៏បានបន្តបរិច្ចាគនូវថវិកាដ៏ថ្លៃថ្លា ចំនួន ៥,០០០ដុល្លារ (ប្រាំពាន់ដុល្លារអាមេរិក) ជូនដល់កាកបាទក្រហមកម្ពុជា ដើម្បីចូលរួមអបអរសាទរខួបទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២ ក្រោមប្រធានបទ «ទាំងអស់គ្នារួមជាមួយកាកបាទក្រហមកម្ពុជា ដោះស្រាយបញ្ហាប្រឈមនានា និងបន្តពង្រឹងភាពធន់សហគមន៍»។

ជាមួយគ្នានេះដែរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏បានផ្ញើលិខិតថ្លែងអំណរគុណជូន សម្តេចក្រឡាហោម ស ខេង និងលោកជំទាវ ដែលបានបន្តឧបត្ថម្ភនូវថវិកាផ្ទាល់ខ្លួនជូនដល់កាកបាទក្រហមកម្ពុជា ក្នុងឱកាសអបអរសាទរខួបទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២២។ ទទ្ទឹមនេះដែរ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ក៏បានប្រសិទ្ធពរ បរវសួរស្តីមហាប្រសើរ និងព្រះពុទ្ធពរទាំងបួន៤ប្រការ  ជូនសម្តេចក្រឡាហោម និងលោកជំទាវនាឱកាសដ៏ថ្លៃថ្លានេះផងដែរ៕

ដោយ៖ នាយកដ្ឋានព័ត៌មានវិទ្យា