នៅរសៀលថ្ងៃទី៣១ ខែតុលា ឆ្នាំ២០១៧ នាទីស្តីក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យគណៈប្រតិភូកីឡាប៉េតង់ ចំនួន១២នាក់ ចូលជួបសម្តែងការគួរសម មុននឹងចេញដំណើរទៅប្រទេសចិន ដើម្បីចូលរួមប្រកួតកីឡាពិភពលោកលើកទី១៦។
សម្តេចក្រឡាហោម បានសម្តែងនូវការរំភើប និងសង្ឃឹមចំពោះកីឡាករកីឡាការនីប៉េតង់ ដែលនឹងត្រៀមខ្លួនទៅប្រកួតនៅប្រទេសចិន ហើយសម្តេចក៏បានផ្តាំផ្ញើ នេះជាឱកាសល្អមួយទៀត ដើម្បីចូលរួមប្រកួតយកពានរង្វាន់មេដាយមាសត្រឡប់មកប្រទេសជាតិវិញ ព្រោះកន្លងមកប្រទេសកម្ពុជា ធ្លាប់ទទួលបានមេដាយមាស ចំនួន៧៧ ប្រាក់ចំនួន ៦៦ និងសំរិទ្ធិចំនួន ១០០ នឹងផ្តាំឱ្យកីឡាករទាំងអស់ ខំរក្សាសុខភាព ត្រូវចេះសាមគ្គីគ្នា ដើម្បីទទួលយកជ័យជំនះ និងខិតខំទំនាក់ទំនងមិត្តភ័ក្តិអន្តរជាតិឱ្យបានល្អ ទោះចាញ់ក្តី ឈ្នះក្តី ដើម្បីទាញផលប្រយោជន៍ជូនប្រទេសជាតិ។
នៅចុងបញ្ចប់សម្តេច បានផ្តល់ថវិកាមួយចំនួនជូនដល់កីឡាករកីឡាការនីប៉េតង់ និងថតរូបទុកជាអនុស្សាវរីយ៍៕
