សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានកោតសរសើរចំពោះកម្លាំងនគរបាលជាតិទាំងអស់ដែលមានឆន្ទៈមោះមុត ក្នុងការបង្ក្រាបបទល្មើសគ្រឿងញៀន ទោះបីប្រទេសកម្ពុជា និងពិភពលោកកំពុងជួបបញ្ហាជំងឺកូវីដ-១៩ក៏ដោយ កម្លាំងនគរបាលនៅតែខិតខំប្រឹងប្រែងបន្ដបេសកកម្មប្រយុទ្ធប្រឆាំងបទល្មើសគ្រឿងញៀន។
ក្នុងពិធីប្រគល់រថយន្ត Ford Ranger Pick-Up ចំនួន៨៧គ្រឿង ជូនស្នងការដ្ឋាននគរបាលខេត្ត ចំនួន២៣ នាថ្ងៃទី០៦ ខែកក្កដា ឆ្នាំ២០២១ នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង បានកោតសរសើរកន្លងមកនេះ ទោះបីប្រឈមបញ្ហាជំងឺកូវីដ-១៩ យ៉ាងណាក៏ដោយ ការបង្រ្កាបបទល្មើសទទួលបានលទ្ធផលល្អយ៉ាងប្រសើរ រហូតដល់ ៨០ភាគរយ ទៅ៩០ភាគរយនៃបទល្មើសសរុបដែលបានកើតឡើង។
សម្ដេចក្រឡាហោម មានប្រសាសន៍ថា «បទល្មើសគ្រឿងញៀនក៏មានថយចុះបន្ដិចមែន ក៏ប៉ុន្ដែគឺចាត់ទុកថាជាជោគជ័យមួយយ៉ាងធំផងដែរ ក្នុងពេលកូវីដ-១៩នេះ។ ព្រោះថា ទោះបីកូវីដ-១៩ ក៏ដោយ ក៏មានជនឆក់យកឱកាសនេះ ដើម្បីលួចផលិត និងនាំចូលនូវសារធាតុញៀនផងដែរ»។
ពាក់ព័ន្ធនឹងបញ្ហាគ្រឿងញៀននេះ សម្ដេចក្រឡាហោម បានគូសបញ្ជាក់ថា ចាប់តាំងពីបើកយុទ្ធនាការបង្រ្កាបគ្រឿងញៀនមក រហូតដល់ពេលនេះ ការបង្ក្រាបបានបទល្មើសគ្រឿងញៀនច្រើនរបស់កម្លាំងសមត្ថកិច្ចបញ្ជាក់ឱ្យឃើញពីទឹកចិត្តដ៏មោះមុត ពោលគឺឆន្ទៈមោះមុត ចំពោះការប្ដេជ្ញាចិត្តដ៏ខ្លាំងក្លារបស់កម្លាំងសមត្ថកិច្ចក្នុងពេលប្រយុទ្ធប្រឆាំងគ្រឿងញៀននេះ។ សម្ដេចក៏បានធ្វើការកោតសរសើរចំពោះកិច្ចខិតខំប្រឹងប្រែងបំពេញបេសកម្មរបស់សមត្ថកិច្ចពាក់ព័ន្ធទាំងអស់ ដែលធ្វើឲ្យកិច្ចការងារនេះទទួលបានលទ្ធផលល្អ៕
ដោយ ៖ នាយកដ្ឋានព័ត៌មានវិទ្យា