នៅទីស្ដីការក្រសួងមហាផ្ទៃ នាព្រឹកថ្ងៃពុធ ទី១៧ ខែកុម្ភៈ ឆ្នាំ២០២១នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំឆ្លងឯកសារសន្និបាតបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់ក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គលេខាធិការ អគ្គនាយក នៃអគ្គនាយកដ្ឋានចំណុះក្រសួងមហាផ្ទៃ ថ្នាក់ដឹកនាំ និងមន្ត្រីជំនាញជាច្រើនរូបផងដែរ។

សម្ដេចក្រឡាហោម បានមានប្រសាសន៍ថា កិច្ចប្រជុំនៅក្នុងថ្ងៃនេះ គឺដើម្បីឆ្លងខ្លឹមសាររបាយការណ៍សម្រាប់បម្រើឲ្យសន្និបាតក្រសួងមហាផ្ទៃ ដែលនឹងប្រព្រឹត្តទៅនៅថ្ងៃទី២៤ និង២៥ ខែកុម្ភៈ  ខាងមុខនេះ។ សម្ដេចក្រឡាហោម បានធ្វើការកោតសរសើរដល់ថ្នាក់ដឹកនាំ និងគ្រប់អគ្គនាយកដ្ឋានដែលបានផ្ដល់ជារបាយការណ៍មូលដ្ឋាន សម្រាប់ក្រុមការងារបូកសរុបជារបាយការណ៍រួម។

ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ បានធ្វើសេចក្ដីរាយការណ៍ដកស្រង់សង្ខេប ដោយលើកឡើងថា របាយការណ៍ព្រាងសម្រាប់បម្រើឲ្យសន្និបាតក្រសួងមហាផ្ទៃនាពេលខាងមុខនេះ រួមមានសមិទ្ធផលសម្រេចបានក្នុងឆ្នាំ២០២០កន្លងមករបស់អគ្គនាយកដ្ឋាន អង្គភាពចំណុះក្រសួងមហាផ្ទៃ បញ្ហាប្រឈមនានា និងទិសដៅការងារសម្រាប់ឆ្នាំ២០២១។ ឯកឧត្តម នាយឧត្តមសេនីយ៍ បានបន្ថែមថា ការចងក្រងជាឯកសាររបាយការណ៍នេះ ធ្វើឡើងទៅបានដោយមានការចូលរួមសហការយ៉ាងសកម្មពីថ្នាក់ដឹកនាំ និងផ្នែកពាក់ព័ន្ធនានា នៃអគ្គនាយកដ្ឋានចំណុះក្រសួងមហាផ្ទៃ។

ឯកឧត្តម នាយឧត្តមសេនីយ៍ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ ក៏បានលើកឡើងផងដែរថា សន្និបាតក្រសួងមហាផ្ទៃ គឺមានការអញ្ជើញចូលរួមពីក្របខណ្ឌថ្នាក់ដឹកនាំ ភ្ញៀវកិត្តិយសពីតំណាងក្រសួង មន្ទីរ ថ្នាក់ដឹកនាំក្រសួងមហាផ្ទៃ ក៏ដូចជាថ្នាក់ដឹកនាំថ្នាក់ខេត្តផងដែរ។ ឯកឧត្តម នាយឧត្តមសេនីយ៍ បានបន្តថា សន្និបាតក្រសួងមហាផ្ទៃដ៏មានសារៈសំខាន់នេះ នឹងមានសុន្ទរកថាបើកដ៏ខ្ពស់ខ្ពង់របស់សម្ដេចក្រឡាហោម អំពីលទ្ធផលការងារឆ្នាំ២០២០ និងទិសដៅសម្រាប់ឆ្នាំ២០២១, ការផ្សព្វផ្សាយគោលនយោបាយ ភូមិ ឃុំ សង្កាត់ មានសុវត្ថិភាព ក៏ដូចជាការពិភាក្សាជាក្រុមផងដែរ៕ កញ្ញា

ដោយ៖ នាយកដ្ឋានព័ត៌មានវិទ្យា