នាព្រឹកថ្ងៃពុធ ទី១០ ខែកុម្ភៈ ឆ្នាំ២០២១ ឯកឧត្តម ឧត្តមសេនីយ៍ឯក លឹម ផាន់ភារៈ អគ្គនាយករង នៃអគ្គនាយកដ្ឋាន ភស្តុភារ និងហិរញ្ញវត្ថុ ក្រសួងមហាផ្ទៃ បានអញ្ជើញជាអធិបតីក្នុងពិធីបិទសិក្ខាសាលាស្តីពី “សុខភាពនគរបាល” អមដំណើរដោយ ឯកឧត្តម ឧត្តមសេនីយ៍ឯក ជា ណារ៉េត ប្រធាននាយកដ្ឋានសុខាភិបាល ឯកឧត្តម អស់លោក អនុប្រធាននាយកដ្ឋាន រួមជាមួយនឹងលោកស្នងការរង និងមន្រ្តីក្រោមឳវាទ នៃស្នងការដ្ឋាននគរបាលខេត្តសៀមរាប ជាច្រើនរូបផងដែរ។

ឯកឧត្តម ឧត្តមសេនីយ៍ឯក បានមានប្រសាសន៍ថា សុខភាព គឺមានសារៈសំខាន់ណាស់ពីព្រោះថាពេលមានសុខភាពល្អ គឺមានអ្វីៗទាំងអស់ សុខភាពជាទ្រព្យសម្បត្តិទី១ ដែលគ្រប់គ្នាមិនអាចខ្វះបាន។ ក្នុងឱកាសនេះដែរ ឯកឧត្តម ឧត្តមសេនីយ៍ឯក បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង របស់ថ្នាក់ដឹកនាយកដ្ឋានសុខាភិបាល ដែលបានសហការបានយ៉ាងល្អប្រសើរជាមួយស្នងការដ្ឋាននគរបាលខេត្តសៀមរាប ដែលធ្វើឲ្យកម្មវិធីសិក្ខាសាលានេះ ទទួលបានលទ្ធផលល្អប្រសើរ ជាពិសេសសិក្ខាកាម ដែលបានចូលរួមក្នុងសិក្ខាសាលានេះ មានការយល់ដឹងខ្ពស់គួរជាទីមោទនៈ។ ឆ្លៀតក្នុងឳកាសនេះផងដែរ ឯកឧត្តម ឧត្តមសេនីយ៍ឯក បានផ្តាំផ្ញើដល់សិក្ខាកាមឲ្យយកចំណេះដឹង ដែលទទួលបានពីសិក្ខាសាលានេះ យកទៅអនុវត្តន៍ អប់រំ ផ្សព្វផ្សាយបន្តដល់មន្រ្តីក្រោមឱវាទ ជាកងកម្លាំងនគរបាល ប្រជាពលរដ្ឋក្នុងមូលដ្ឋាន និង ក្រុមគ្រួសារ ឲ្យមានការយល់ដឹងពីការថែទាំសុខភាពយើងទាំងអស់គ្នា។

ក្នុងឱកាសដ៏មានអត្ថន័យនេះ ឯកឧត្តម ឧត្តមសេនីយ៍ឯក បានផ្តល់មតិផ្តាំផ្ញើដល់អង្គសិក្ខាសាលា និងសិក្ខាកាមទាំងអស់ ឲ្យខិតខំចូលរួមពង្រឹងនូវគោលជំហរចំនួន ០៣ចំណុច រួមមាន៖ ទី១-ការពារតម្លៃ នៃឯកសណ្ឋាននគរបាលជាតិ ទោះបីជាស្ថិតក្នុងកាលៈទេសៈណាក៏ដោយ ទី២-ត្រូវមានការត្រិះរិះពិចារណាក្នុងការបញ្ចេញព័ត៌មានឯកជន និងតាមបណ្តាអង្គភាពនានា តាមរយៈប្រព័ន្ធបណ្តាញសង្គម និងទី៣-ត្រូវមានសាមគ្គីភាពផ្ទៃក្នុងអង្គភាពទាំងមូល៕

ប្រភព៖ អគ្គនាយកដ្ឋានភស្តុភារ និងហិរញ្ញវត្ថុ