ក្នុងនាមតំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះជួយខេត្តបាត់ដំបង នាព្រឹកថ្ងៃសៅរ៍ទី២១ ខែវិច្ឆិកា ឆ្នាំ២០២០នេះ ឯកឧត្តម កុល វីរក្ស រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសង្កែ និងឯកឧត្តម ដួង តារា អនុរដ្ឋលេខាធិការទីស្តីការគណៈរដ្ឋមន្ត្រី និងជាជំនួយការផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា បានដឹកនាំក្រុមការងារចុះសួរសុខទុក្ខ និងនាំយកអំណោយសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនបងប្អូនប្រជាពលរដ្ឋរងគ្រោះដោយជំនន់ទឹកភ្លៀងចំនួន ១០០០ គ្រួសារ ក្នុងស្រុកសង្កែ ខេត្តបាត់ដំបង (ដែលរៀបចំធ្វើឡើងនៅលើ ០២ ទីតាំង) ដោយមួយគ្រួសារៗ ទទួលបានអង្ករ ២៥គីឡូក្រាម មី ១កេះ ទឹកសុទ្ធ ១កេះ អាវ១ ត្រីខ ១យួរ ថវិកា ៥មុឺនរៀល។
ក្នុងឱកាសនោះ ឯកឧត្តម កុល វីរក្ស និងឯកឧត្តម ដួង តារា បាននាំយកនូវសេចក្តីផ្តាំផ្ញើសួរសុខទុក្ខពីសំណាក់សម្តេចទាំងទ្វេ ដែលលោកតែងតែបានតាមដានប្រកបដោយការយកចិត្តទុកដាក់ខ្ពស់បំផុត ចំពោះស្ថានភាពរស់នៅប្រចាំថ្ងៃរបស់បងប្អូនប្រជាពលរដ្ឋ។ ឯកឧត្តមក៏បានបញ្ជាក់ជូនបងប្អូនពីការអាក់ខានរៀបចំកម្មវិធីកាលពីថ្ងៃទី១១ ខែវិច្ឆិកា ឆ្នាំ២០២០ ហើយដែលត្រូវយកមកធ្វើថ្ងៃនេះវិញ គឺដោយសារតែថ្នាក់ដឹកនាំយើងមួយចំនួនដែលមានភារកិច្ចក្នុងពិធីនេះត្រូវជាប់ធ្វើចត្តាឡីស័កពាក់ព័ន្ធព្រឹត្តិការណ៍ ៣ វិច្ឆិកា។
ជាមួយគ្នានេះដែរ ដោយសារស្ថានភាពកូវីដ-១៩ កំពុងមានសន្ទុះកើនឡើងនៅទូទាំងពិភពលោក ឯកឧត្តមរដ្ឋលេខាធិការក៏បានអំពាវនាវឲ្យបងប្អូនប្រជាពលរដ្ឋទាំងអស់បន្តប្រកាន់ខ្ជាប់គោលការណ៍អនាម័យ និងស្តាប់តាមការណែនាំរបស់អាជ្ញាធរ ដើម្បីចៀសផុតពីជម្ងឺដ៏កាចសាហាវនានា ដែលនាំឲ្យប៉ះពាល់ដល់សុខភាពពិសេសនៅក្នុងគ្រាបន្ទាប់ពីការស្រកចុះនូវជំនន់ទឹកភ្លៀងនេះ និងសូមបងប្អូនខិតខំបង្កបង្កើនផលឡើងវិញ ដើម្បីផ្គត់ផ្គង់ជីវភាពប្រចាំថ្ងៃ និងរកចំណូលក្នុងគ្រួសារ ព្រមទាំងរួមចំណែកជួយឲ្យមានស្ថេរភាពនៃសេដ្ឋកិច្ចជាតិ៕