នៅព្រឹកថ្ងៃសៅរ៍ ទី៧ ខែវិច្ឆិកា ឆ្នាំ២០២០ ឯកឧត្តម ឡាំ ជា រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកគាស់ក្រឡ ខេត្តបាត់ដំបង ចុះសួរសុខទុក្ខ និងនាំយកអំណោយចែកជូនប្រជាពលរដ្ឋចំនួន៣៨៦គ្រួសារ នៅឃុំឆ្នាល់មាន់ និងឃុំព្រះផុស ស្រុកគាស់ក្រឡ ខេត្តបាត់ដំបង ដែលបាននឹងកំពុងទទួលរងគ្រោះ និងប៉ះពាល់ធ្ងន់ធ្ងរដល់ផលដំណាំស្ទេីរតែគ្រប់ប្រភេទដោយសារទឹកជំនន់។
ក្នុងឱកាសនោះ ឯកឧត្តម ឡាំ ជា ក៏បាននាំយកនូវជំនួយសប្បុរសធម៌របស់សប្បុរសជននៃអង្គការគាំពារសកលនៃកម្ពុជាចែកជូនប្រជាពលរដ្ឋរងគ្រោះរួមមាន: អង្ករ ចំនួន១៧,៦៤តោន, ថ្នាំពេទ្យជាអំណោយពីទូរទស្សន៍ប៉ុស្តិ៍លេខ៥ ៣៨៦កញ្ចប់ និងថវិការផ្ទាល់របស់ឯកឧត្តម រួមជាមួយប្រតិភូក្រុមការងាររាជរដ្ឋាភិបាល ក្នុងម្នាក់ ១មុឺនរៀលផងដែរ។
ទោះបីជាមានភ្លៀងធ្លាក់ជោគជាំយ៉ាងណាក៏ដោយ ឯកឧត្តមប្រធានប្រតិភូរួមជាមួយបងប្អូនប្រជាពលរដ្ឋបានសំណេះសំណាល និងផ្តាំផ្ញេីសេចក្តីនឹករលឹកពីសំណាក់សម្តេចតេជោ និងសម្តេចក្រឡាហោមដល់បងប្អូនទាំងអស់គ្នាបានដោយភាពស្និតស្នាលបំផុត។
ជាចុងក្រោយឯកឧត្តម ឡាំ ជា ប្រធានក្រុមការងារបានប្រគល់អំណោយដល់ប្រជាពលរដ្ឋ និងថតរូបអនុស្សាវរីយ៍ជាមួយបងប្អូនទាំងអស់ដោយក្តីរីករាយជាមួយអាកាសធាតុដ៏ត្រជាក់ត្រជុំ៕
