ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការស្តីទីនៃអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍បែបនេះពិធីបិទសិក្ខាសាលាស្តីពីការប្រសិទ្ធភាពពង្រឹងយន្តការភូមិ ឃុំ សង្កាត់ ស គ្មានគ្រឿងញៀន នៅរសៀលថ្ងៃទី៣ ខែវិច្ឆិកា ឆ្នាំ២០២០ នៅសាលាខេត្តព្រះវិហារ។
ក្រោយពីដាក់ឱ្យដំណេីរការនៅយន្តការភូមិ ឃុំ សង្កាត់ ស គ្មានគ្រឿងញៀនដែលជាគំនិតផ្តួចផ្តេីមរបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនរួចមក តំណាងពីតំណាងស្ថាប័ន អង្គភាពត្រួតពិនិត្យគ្រឿងញៀនពីថ្នាក់ជាតិ គណកម្មាធិការត្រូតពិនិត្យគ្រឿងញៀនខេត្តព្រះវិហារ ស្រុកជាំក្សាន្ត ស្រុកឆែប ឃុំជាំក្សាន្ត ឃុំកំពង់ស្រឡៅ បានធ្វេីការជជែកពិភាក្សាពិនិត្យសមិទ្ធិផលមួយឆ្នាំនៃការដាក់ឱ្យអនុវត្តនូវយន្តការភូមិឃុំសង្កាត់ ស គ្មានគ្រឿងញៀន នូវការងារដែលសម្រេចបាន បញ្ហាប្រឈមនានានៅមូលដ្ឋាននិងបន្តដាក់ទិសដៅការងារដេីម្បីរួមគ្នាដោះស្រាយ។
លោកជំទាវបណ្ឌិត សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា បានមានប្រសាសន៍ថា ប្រជាពលរដ្ឋល្អ ត្រូវមានសុខភាពល្អ មានសុវត្ថិភាព ដោយគ្មានគ្រឿងញៀន គ្មានអំពេីរហិង្សាទាំងក្នុងក្រុមគ្រួសារ និងសហគមន៍។
ក្នុងឱកាសនោះ ឯកឧត្ដម ឧត្តមសេនីយ៍ឯក នាក់ យុទ្ធា បានមានប្រសាសន៍បន្តថា ការប្រយុទ្ធប្រឆាំងគ្រឿងញៀនទទួលបានជោគជ័យមិនអាចផ្តោតតែទៅលេីការងារបង្រ្កាបតែមុខបានទេ គឺត្រូវដេីរទៅជាមួយគ្នាជាពហុវិស័យមានការងារអប់រំផ្សព្វផ្សាយ ការងារព្យាបាល ស្តារនីតិសម្បទានិងសមាហរណកម្ម ហេីយយន្តការភូមិ ឃុំ សង្កាត់ ស គ្មានគ្រឿងញៀនមានប្រសិទ្ធភាពត្រូវការចូលរួមជាចាំបាច់គ្រប់អ្នកពាក់ព័ន្ធនៅសហគមន៍មូលដ្ឋាននិងការគាំទ្រពីថ្នាក់ស្រុក-ខេត្ត។
ក្នុងឱកាសនោះដែរ ឯកឧត្តម ឧត្តមសេនីយ៍ឯក នាក់ យុទ្ធា បានមានប្រសាសន៍បន្តដោយថ្លែងអំណរគុណដល់អ្នកពាក់ព័ន្ធទាំងអស់ដែលបានបន្តរួមគ្នាអនុវត្តយន្តការភូមិឃុំសង្កាត់ ស គ្មានគ្រឿងញៀន និងបានស្នេីសុំបន្តយន្តការអចិន្រ្តៃយ៍និងមានលទ្ធភាព សមត្ថភាព ក្នុងទប់ស្កាត់ គ្រប់គ្រង និងដោះស្រាយបញ្ហាគ្រឿងញៀន បន្តបញ្ជូនសារអប់រំដល់ប្រជាពលរដ្ឋ បន្តផ្តល់សេវាព្យាបាល ស្តារនីតិសម្បទា និងសមាហរណកម្មដល់អ្នកប្រេីប្រាស់គ្រឿងញៀន បន្តអភិវឌ្ឍលេីកកម្ពស់ជីវភាពប្រជាពលរដ្ឋ បន្តគ្រប់គ្រងព័ត៌មាន មុខសញ្ញាពាក់ព័ន្ធនឹងបញ្ហាគ្រឿងញៀនរាយការណ៍ជូនសមត្ថកិច្ចមូលដ្ឋានមានវិធានការច្បាប់៕
ប្រភព: អាជ្ញាធរជាតិប្រយុទ្ធប្រឆាំងគ្រឿងញៀន