ព្រឹកថ្ងៃអង្គារទី២៧ ខែតុលា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន និងជាប្រធានក្រុមការងារ អញ្ជើញដឹកនាំកិច្ចប្រជុំពិភាក្សារបាយការណ៍លទ្ធផលបឋមចុះអង្កេតស្រាវជ្រាវករណីពាក់ព័ន្ធនឹងការបើកអាជីវកម្មអុជកាំជ្រួចជាល្បែងភ្នាល់របស់ក្រុមហ៊ុនមួយ ក្នុងស្រុកអន្លង់វែង ខេត្តឧត្តរមានជ័យ តាមការចុះផ្សាយសារព័ត៌មានថាមានផលប៉ះពាល់ដល់ប្រជាពលរដ្ឋរស់នៅទីនោះ។
កិច្ចប្រជុំនេះប្រព្រឹត្តទៅនៅសាលប្រជុំរបស់អគ្គាធិការដ្ឋាន និងមានការអញ្ជើញចូលរួមពី ឯកឧត្តម អគ្គាធិការរង ប្រធាននាយកដ្ឋានគ្រប់គ្រងអាវុធជាតិផ្ទុះ តំណាងអគ្គនាយកដ្ឋានរដ្ឋបាល អនុប្រធាននាយកដ្ឋានអភិបាលរងខេត្តតំណាងឯកឧត្តម អភិបាលខេត្ត លោកស្នងការខេត្ត និងអភិបាលស្រុកអន្លង់វែង។
សូមជម្រាបថា ក្រសួងមហាផ្ទៃបានសម្រេចបង្កើតក្រុមការងារស្រាវជ្រាវអង្កេតក្រុមហ៊ុននេះ ដែលមាន ឯកឧត្តម អ៉ីវ លាង ជាប្រធាន និងមានសមាសភាពចូលរួមពីអគ្គស្នងការដ្ឋាននគរបាលជាតិ អគ្គនាយកដ្ឋានរដ្ឋបាល អគ្គាធិការដ្ឋាន ក្រុមប្រឹក្សានីតិកម្ម និងរដ្ឋបាលខេត្តឧត្តរមានជ័យ ស្នងការដ្ឋាននគរបាលខេត្ត និងរដ្ឋបាលស្រុកអន្លង់វែង៕
ប្រភព៖ អគ្គាធិការដ្ឋាន
