នៅទីស្តីការក្រសួងមហាផ្ទៃ នារសៀលថ្ងៃចន្ទទី២៦ ខែតុលា ឆ្នាំ២០២០នេះ ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ អញ្ជើញដឹកនាំក្រុមការងារក្រសួងមហាផ្ទៃ ចូលរួមកិច្ចប្រជុំក្រុមការងារធនាគារពិភពលោកស្តីពីគម្រោងធ្វើឱ្យប្រសើរឡើងនូវការគ្រប់គ្រងសំរាមសំណល់រឹង និងសំណល់ប្លាស្ទិច តាមរយៈប្រព័ន្ធសន្និសីទវីដេអូ ដោយមានការអញ្ជើញចូលរួមពី ឯកឧត្តម ស៊ វរិន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ លោក បួន ហេង ប្រធាននាយកដ្ឋានមុខងារ និងធនធាន និងមន្រ្តីតំណាងធនាគាពិភពលោកប្រចាំកម្ពុជា ព្រមទាំងមន្រ្តីពាក់ព័ន្ធផងដែរ។

      ក្នុងកិច្ចប្រជុំនេះគឺបានពិភាក្សាទៅលើ៣ចំណុចសំខាន់ៗរួមមាន៖ទី ១.បង្ហាញ និងពិភាក្សាអំពីការគាំទ្រនៅក្នុងការរៀបចំគម្រោង ជាពិសេសការសិក្សាលទ្ធភាពចំណាយជាមុនសម្រាប់ទីលានចាក់សំរាមដែលសមស្រប និងការប៉ាន់ប្រមាណចំណាយថ្លៃដើមសម្រាប់ហេដ្ឋារចនាសម្ព័ន្ធសំរាមសំណល់រឹង និងកន្លែងចាក់សំរាម ការកសាងសមត្ថភាព និងជម្រើសនៃការស្តារចំណាយថ្លៃដើមឡើងវិញសម្រាប់ខេត្ត /ក្រុងដែលអាចដាក់បញ្ចូលទៅក្នុងគម្រោង។ ដូចជាសៀមរាប បាត់ដំបង កំពង់ស្ពឺ ព្រះសីហនុ និងកណ្តាល។ ទី២.ពិភាក្សាបន្ថែមទៀតអំពីតំរូវការនៃការរៀបចំគម្រោងដែលកើតចេញពីក្របខ័ណ្ឌបរិស្ថាន និងសង្គមជំហាននៃការរៀបចំ និងស្ថានភាពនៃការគាំទ្រ។ និងទី៣.ពិភាក្សាអំពីការគាំទ្របន្ថែមទៀតសម្រាប់ការអភិវឌ្ឍគោលនយោបាយគ្រប់គ្រងប្លាស្ទិក និងការចូលរួមពិគ្រោះយោបល់របស់ភាគីពាក់ព័ន្ធដើម្បីបង្ហាញនិងពិគ្រោះយោបល់លើគោលនយោបាយផ្លាស្ទិក អាទិភាពដែលបានជ្រើសរើស។

      សូមជម្រាបផងដែរថា ការអភិវឌ្ឍគម្រោងនេះមានគោលបំណង ដើម្បីកែលំអសេវាកម្មគ្រប់គ្រងសំណល់រឹង និងប្លាស្ទីក នៅក្នុងទីក្រុងសាកល្បងដែលត្រូវបានជ្រើសរើស សម្រាប់នៅប្រទេសកម្ពុជាទីក្រុងសាកល្បងដែលត្រូវបានជ្រើសរើស មានដូចជា៖ ខេត្តសៀមរាប ខេត្តបាត់ដំបង ខេត្តកំពង់ស្ពឺ ខេត្តព្រះសីហនុ និងខេត្តកណ្ដាល។ ជាងនេះទៀត គម្រោងនេះនឹងត្រូវធ្វើការវាយតម្លៃទៅលើបច្ចេកទេសសម្រាប់ទីក្រុងទាំង៥នេះ មានដូចជា៖
-បរិមាណនិងសមាសធាតុនៃកាកសំណល់ដែលបានបង្កើត និងមធ្យោបាយនៃការចោល
-ការប៉ាន់ប្រមាណបរិមាណ និងសមាសធាតុ នៃសំណល់ទីក្រុង និងពាណិជ្ជកម្ម សម្រាប់ពេលអនាគត
-ការវាយតម្លៃគ្រឿងបរិក្ខារសម្រាប់ដោះស្រាយក្នុងតម្លៃសមរម្យទុកមុន
-ការស្នើសុំប្រព័ន្ធគ្រប់គ្រងកាកសំណល់ដែលសមស្រប និងសន្សំសំចៃបំផុត សម្រាប់ការប្រមូល ផ្ទេរ ដឹកជញ្ជូន និងការបោះចោលសំណល់ ដោយផ្ដោតសំខាន់លើតំបន់សម្រាប់ចាក់សំរាម។

      លើសពីនេះទៀតនៅក្នុងខ្លឹមសារនៃកិច្ចប្រជុំនេះក៏បានបញ្ជាក់ផងដែរថា ការគ្រប់គ្រងសំរាមប្រកបដោយជោគជ័យ ទាមទារឱ្យមានប្រព័ន្ធត្រួតពិនិត្យដែលអាចទុកចិត្តបាន ដើម្បីចូលរួមក្នុងដំណើរការគ្រប់គ្រង។ ការប្រមូលព័ត៌មាន និងឧបករណ៍ត្រួតពិនិត្យ ដែលនឹងត្រូវស្រាវជ្រាវនិងអភិវឌ្ឍក្រោមគម្រោងនេះ អាចរួមមាន៖ តម្លៃក្នុងការគ្រប់គ្រងសំណល់រឹង និងប្លាស្ទីក, ការផលិតសំណល់, តំបន់សម្រាប់សេវាកម្មគ្រប់គ្រងសំណល់, ការគ្រោងនូវប្រព័ន្ធនៃមធ្យោបាយសម្រាប់ប្រមូលសំរាម, ការដឹកជញ្ជូនសំរាមទៅកាន់តំបន់ចាក់សំរាម, និងការត្រួតពិនិត្យគុណភាពបរិស្ថានផងដែរ៕

ដោយ៖ នាយកដ្ឋានព័ត៌មានវិទ្យា