នៅទីស្តីការក្រសួងមហាផ្ទៃ នារសៀលថ្ងៃចន្ទ ទី២៦ ខែតុលា ឆ្នាំ២០២០ ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម (គ.ជ.ប.ទ) អញ្ជើញជាអធិបតីក្នុងពិធីប្រកាសចូលកាន់មុខតំណែងលោកឧត្តមសេនីយ៍ទោ ញ៉ែម វ៉ាន់នី ជាអនុប្រធានលេខាធិការដ្ឋាននៃគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម(គ.ជ.ប.ទ) ដោយមានការចូលរួមពី អនុប្រធានលេខាធិការដ្ឋាន ប្រធាន អនុប្រធានការិយាល័យ ប្រធាន អនុប្រធានផ្នែក និងមន្ត្រីជាច្រើនរូបទៀត។
ក្នុងឱកាសចូលកាន់មុខតំណែងជាអនុប្រធានលេខាធិការដ្ឋាននៃគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម(គ.ជ.ប.ទ) លោកឧត្តមសេនីយ៍ទោ ញ៉ែម វ៉ាន់នី បានធ្វើការប្តេជ្ញាចិត្តខ្ពស់ ដោយគោរពស្មោះត្រង់ចំពោះជាតិ សាសនា ព្រះមហាក្សត្រ បេ្តជ្ញា គោរពប្រតិបត្តិឱ្យបានខ្ជាប់ខ្ជួននូវរដ្ឋធម្មនុញ្ញនឹងច្បាប់ បេ្តជ្ញាគោរព និងស្មោះត្រង់ចំពោះគោលនយោបាយរបស់រាជរដ្ឋាភិបាល ព្រមទាំងយកអស់ទាំងប្រាជ្ញា ស្មារតី សាមគ្គីភាពផ្ទៃក្នុងដើម្បីបម្រើអង្គភាពមួយនេះឱ្យបានកាន់តែល្អប្រសើរ។
ក្នុងឱកាសនោះ ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម បានសម្តែងនូវការអបអរសាទរ និងសេចក្តីរីករាយ ស្វាគមន៍ចំពោះលោកឧត្តមសេនីយ៍ទោ ញ៉ែម វ៉ាន់នី ដែលត្រូវបានរាជរដ្ឋាភិបាលផ្តល់សេចក្តីទុកចិត្តតែងតាំងជាអនុប្រធានលេខាធិការដ្ឋាននៃគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម(គ.ជ.ប.ទ)នាពេលនេះ។
ជាមួយគ្នានេះ ឯកឧត្តមក៏បានរៀបរាប់អំពីសាវតារបស់គណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្មដែលចាប់តាំងពីកកើតរហូតមកដល់ពេលបច្ចុប្បន្ន។ ឯកឧត្តបន្តថា អង្គភាពរបស់យើងកើតឡើងមិនមែនជាការចៃដន្យនោះទេ ដោយការងារស្នូលដែលគណៈកម្មធិការជាតិធ្វើនាពេលបច្ចុប្បន្ន គឺត្រូវត្រួតពិនិត្យមន្ទីរឃុំឃាំង ព្រមទាំងបណ្តុះបណ្តាលផ្សព្វផ្សាយអប់រំដល់គ្រប់អង្គភាព ពិសេសអង្គភាពប្រដាប់អាវុធត្រូវធ្វើយ៉ាងណាកុំឱ្យប្រពឹ្រត្តអំពើរទារុណកម្ម។
ជាចុងក្រោយ ឯកឧត្តម នុត សាអាន បានធ្វើការផ្តាំផ្ញើរ និងជូនពរដល់មន្ត្រីនៃគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្មទាំងអស់ឱ្យមានសុខភាពល្អ និងរួមសាមគ្គីគ្នា ព្រមទាំងខិតខំបំពេញភារកិច្ចឱ្យទទួលបានជោគជ័យចាប់ពីពេលនេះតទៅ៕
ដោយ៖ នាយកដ្ឋានព័ត៌មានវិទ្យា