នៅទីស្ដីការក្រសួងមហាផ្ទៃ នាព្រឹកថ្ងៃសុក្រ ទី១១ ខែកញ្ញា ឆ្នាំ២០២០នេះ ឯកឧត្តម សន្តិបណ្ឌិត ខៀវ សុភ័គ រដ្ឋលេខាធិការក្រសួងមហាផ្ទៃ និងជានាយកខុទ្ទកាល័យសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់សម្ដេចក្រឡាហោម អញ្ជើញជាអធិបតីដឹកនាំកិច្ចប្រជុំពិនិត្យ ពិភាក្សាលើកិច្ចសន្យាស្ដីពីការជួសជុល និងសាងសង់ប្រព័ន្ធផ្គត់ផ្គង់ទឹកស្អាតនៅឃុំក្របៅ ស្រុកកំចាយមារ ខេត្តព្រៃវែង ជាមួយក្រុមការងារបច្ចេកទេស និងមានការចូលរួមពី ឯកឧត្តម ស្ដើង សុខុម រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចុះជួយស្រុកកំចាយមារ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ អគ្គលេខាធិការរង ក្រសួងមហាផ្ទៃ អភិបាលស្រុកកំចាយមារ មេឃុំ និងមន្ត្រីពាក់ព័ន្ធនានាផងដែរ។

      ឯកឧត្តម សន្តិបណ្ឌិត ខៀវ សុភ័គ បានមានប្រសាសន៍ថា យោងតាមការឯកភាពរបស់សម្ដេចក្រឡាហោម ការប្រជុំថ្ងៃនេះមានគោលបំណងពិនិត្យលើកិច្ចសន្យា ស្ដីពីការជួសជុល និងសាងសង់ប្រព័ន្ធផ្គត់ផ្គង់ទឹកស្អាតនៅឃុំក្របៅ ស្រុកកំចាយមារ ខេត្តព្រៃវែង ដើម្បីទទួលបាននូវគំនិតយោបល់ចូលរួមបន្ថែមផ្សេងៗពាក់ព័ន្ធនឹងកិច្ចសន្យានេះពីអ្នកគ្រប់គ្រង និងអនុវត្តជាក់ស្ដែងនៅមូលដ្ឋានផ្ទាល់។

នៅក្នុងកិច្ចប្រជុំនេះ ឯកឧត្តម ស្ដើង សុខុម រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចុះជួយស្រុកកំចាយមារ ស្នើឲ្យមានការត្រួតពិនិត្យដិតដល់ទៅលើបញ្ហាបច្ចេកទេស ហើយគួរផ្ដោតការយកចិត្តទុកដាក់ខ្ពស់លើប្រព័ន្ធគុណភាពទឹកឲ្យមានស្តង់ដារ។

      ជាកិច្ចបញ្ចប់ ឯកឧត្តម សន្តិបណ្ឌិត ខៀវ សុភ័គ បានថ្លែងអំណរគុណចំពោះមតិ និងគំនិតយោបល់នានាក្នុងកិច្ចប្រជុំនេះ ហើយឯកឧត្តមបានបញ្ជាក់ថា ក្រុមការងារនឹងទំនាក់ទំនងជាមួយក្រុមបច្ចេកទេសដើម្បីសម្រួលកិច្ចសន្យាស្ដីពីការជួសជុល និងសាងសង់ប្រព័ន្ធផ្គត់ផ្គង់ទឹកស្អាតនៅឃុំក្របៅ ស្រុកកំចាយមារ ខេត្តព្រៃវែងនេះ ដើម្បីរាយការណ៍ និងសុំគោលការណ៍ដ៏ខ្ពង់ខ្ពស់ពីសម្ដេចក្រឡាហោម៕ កញ្ញា

ដោយ៖ នាយកដ្ឋានព័ត៌មានវិទ្យា