(សណ្ឋាគារកាំបូឌីយ៉ាណា រាជធានីភ្នំពេញ )៖ ព្រឹកថ្ងៃចន្ទទី ០៧ ខែកញ្ញា ឆ្នាំ២០២០ នៅសាលប្រជុំសណ្ឋាគារកាំបូឌីយ៉ាណា គ.ជ.ប.ជ បានបេីកសិក្ខាសាលាថ្នាក់ជាតិ "ស្តីពីកិច្ចការពារកុមារពីអំពើជួញដូរ ការរំលោភបំពានផ្សេងៗ និងការធ្វេីទេសន្តរប្រវេសន៍ "រវាងគណៈកម្មាធិការជាតិប្រយុទ្ធប្រឆាំងអំពេីជួញដូរមនុស្ស និងអង្គការឆាលហ្វាន់ (Child Fund)។ សិក្ខាសាលានេះប្រព្រឹត្តិឡេីងក្រោមអធិបតីភាពដ៏ខ្ពង់ខ្ពស់របស់លោកជំទាវ ជូ ប៊ុនអេង រដ្ឋលេខាក្រសួងមហាផ្ទៃ និងជាអនុប្រធានអចិន្ត្រៃយ៍ លោកជំទាវ ប៉ែន រ៉ាស៊ី អនុរដ្ឋលេខាធិការ ក្រសួងសុខាភិបាល លោកជំទាវ ឧត្តមសេនីយ៍ឯក វេជ្ជ.ប៉ុណ្ណ សំខាន់ អគ្គលេខាធិការ គ.ជ.ប.ជ ឯកឧត្តម ឧត្តមសេនីយ៍ឯក ជីវ ផល្លី ប្រធាននាយកដ្ឋានប្រឆាំងការជួញដូរមនុស្ស និងការពារអនិតិជន នៃអគ្គស្នងការដ្ឋាននគរបាលជាតិ និង លោក ប្រាសាន់ វ័រម៉ា ប្រធានប្រចាំប្រទេសអង្គការឆាលហ្វាន់។
សិក្ខាសាលានេះមានការចូលរួមពី ឯកឧត្តម លោកជំទាវជា អគ្គលេខាធិការរង ប្រធានលេខាធិការដ្ឋានរដ្ឋបាល-សរុប ប្រធាន ក្រុមជំនួយកិច្ចការ នៃ គ.ជ.ប.ជ និងតំណាងថ្នាក់ដឹកនាំទទួលបន្ទុកកិច្ចការងារប្រយុទ្ធប្រឆាំងអំពើជួញដូរមនុស្សថ្នាក់ក្រោមជាតិ អង្គការដៃគូអភិវឌ្ឍពាក់ព័ន្ធ មានអង្គការឆាលហ្វាន់(Child Fund) -អង្គការ IOM។
សិក្ខាសាលានេះធ្វើឡើងក្នុងគោលបំណង ផ្លាស់ប្តូរបទពិសោធន៍ភាពប្រឈម និងដំណោះស្រាយ ក្នុងការអនុវត្តកម្មវិធីក្រសួងស្ថាប័ន និងអង្គការដៃគូរជាតិ អន្តរជាតិពាក់ព័ន្ធស្តីពីការបង្ការទប់ស្កាត់ ឆ្លើយតបទៅនឹងបញ្ហាកុមារ និងការជួញដូរ ការរំលោភបំពានផ្សេងៗ និងទេសន្តរប្រវេសន៍។
បន្ថែមពីនេះ សិក្ខាសាលានេះក៏ពិភាក្សាអំពីសកម្មភាពរបស់ក្រសួងស្ថាប័ន និងអង្គការដៃគូរលើកិច្ចការពារកុមារចាប់ពីត្រីមាសទី៤ ឆ្នាំ២០២០ ដល់បំណាច់ឆ្នាំ២០២១ ឆ្លើយតបនឹងផែនការយុទ្ធសាស្រ្តជាតិប្រឆាំងការជួញដូរមនុស្ស ២០១៩-២០២៣ និងបង្ហាញអំពីការខិតខំរបស់យើងទាំងអស់គ្នា ដើម្បីបញ្ឈប់អំពើជួញដូរ ការរំលោភបំពាន និងការធ្វើទេសន្តរប្រវេសន៍របស់កុមារនៅកម្ពុជា៕
ប្រភព៖ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស