នៅទីស្ដីការក្រសួងមហាផ្ទៃ នាព្រឹកថ្ងៃពុធ ទី០២ ខែកញ្ញា ឆ្នាំ២០២០នេះ ក្រសួងមហាផ្ទៃ បានបន្ដរៀបចំកិច្ចប្រជុំអន្ដរក្រសួងពិនិត្យ និងពិភាក្សាលើសេចក្ដីព្រាងច្បាប់ស្ដីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម លើជំពូកទី០២ ស្ដីពីបញ្ជីអត្រានុកូលដ្ឋាន នៅផ្នែកទី០៦ ស្ដីពីការចុះបញ្ជីមរណភាព និងមាត្រាទី៤៥ ស្ដីពីការចុះបញ្ជីមរណភាពជាកាតព្វកិច្ច ក្រោមអធិបតីភាពលោកជំទាវ ចាន់ សុទ្ធាវី រដ្ឋលេខាធិការ ក្រសួងយុត្តិធម៌ និងជាប្រធានក្រុមការងាររៀបចំតាក់តែងសេចក្តីព្រាងច្បាប់ ស្ដីពីអត្រានុកូលដ្ឋានស្ថិតិ អត្រានុកូលដ្ឋាន និងអត្តសញ្ញាណកម្ម ដោយមានការអញ្ជើញចូលរួមពី ឯកឧត្តម នាយឧត្តមសេនីយ៍ សន្តិបណ្ឌិត ម៉ៅ ច័ន្ទតារា រដ្ឋលេខាធិការក្រសួងមហាផ្ទៃ និងជាអនុប្រធានក្រុមការងារទី១ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជាអនុប្រធានក្រុមការងារទី២ ព្រមទាំងសមាជិក សមាជិកាក្រុមការងារ អ្នកជំនាញផ្នែកច្បាប់ ព្រមទាំងមន្រ្តីពាក់ព័ន្ធជាច្រើនរូបផងដែរ។
ក្នុងឱកាសនោះ លោកជំទាវ ចាន់ សុទ្ធាវី រដ្ឋលេខាធិការក្រសួងយុត្តិធម៌ ក៏បានមានប្រសាសន៍ថ្លែងអំណរគុណដល់សមាជិក សមាជិកា នៃក្រុមការងារទាំងអស់ដែលបានចំណាយពេលចូលរួម និងខិតខំប្រឹងប្រែងប្រមូលយកធាតុចូលសំខាន់ៗសម្រាប់ផ្តល់យោបល់លើដំណើរការពិក្សាប្រកបដោយស្មារតីទទួលខុសត្រូវខ្ពស់ ក៏ដូចជាតែងតែចូលរួមគ្រប់កិច្ចប្រជុំក្នុងពេលកន្លងមក។ លោកជំទាវ ក៏បានបន្តថា យោងតាមស្មារតីនៃការចូលរួមរបស់ក្រុមការងារប្រកបដោយឆន្ទះខ្ពស់ទាំងអស់នេះ គឺបានធ្វើឱ្យដំណើរការនៃកិច្ចពិភាក្សា និងពិនិត្យលើសេចក្ដីព្រាងច្បាប់ស្ដីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម មានវឌ្ឍនភាពកើនឡើងយ៉ាងល្អប្រសើរគួរឱ្យកត់សម្គាល់។ ក្នុងនោះផងដែរ លោកជំទាវ ក៏បានជំរុញឱ្យក្រុមការងារទាំងអស់បន្តរក្សាគោលជំហរចូលរួមឱ្យបានគ្រប់កិច្ចប្រជុំ ដើម្បីបន្ថែមល្បឿននៃការពិនិត្យ និងពិភាក្សាឱ្យកាន់តែលឿន និងគ្រប់ជ្រុងជ្រោយ។
ជាងនេះទៀត លោកជំទាវ ក៏បានបញ្ជាក់ថា កិច្ចប្រជុំថ្ងៃនេះ គឺពិភាក្សា និងពិនិត្យលើការងារបន្តពីកិច្ចប្រជុំកាលពីសប្តាហ៍មុន ដែលស្ថិតនៅលើជំពូកទី០២ ស្ដីពីបញ្ជីអត្រានុកូលដ្ឋាន នៃផ្នែកទី០៦ ស្ដីពីការចុះបញ្ជីមរណភាព និងមាត្រាទី៤៥ ស្ដីពីការចុះបញ្ជីមរណភាពជាកាតព្វកិច្ច។
សូមជម្រាបថា សេចក្ដីព្រាងច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម មាន១២ជំពូក និង១៦៩មាត្រា ហើយមានគោលបំណងរួមដូចខាងក្រោម៖
ទី១- ធានាឲ្យមានការចុះបញ្ជីអត្រានុកូលដ្ឋាន ជាកាតព្វកិច្ច ជាសកល ដោយជាប់លាប់ និងជាអចិន្ដ្រៃយ៍។
ទី២- ធានាឲ្យមានការចុះបញ្ជីអត្តសញ្ញាណបុគ្គល ជាសកល ដោយជាប់លាប់ និងជាអចិន្ដ្រៃយ៍។
ទី៣- ធានាថា ការចុះបញ្ជីស្នាក់នៅ ជាកាតព្វកិច្ច ជាសកល ដោយជាប់លាប់ និងជាអចិន្ដ្រៃយ៍។
ទី៤- ធានាឲ្យមនុស្សគ្រប់រូបមានអត្តសញ្ញាណខាងផ្លូវច្បាប់ តាមរយៈការចុះបញ្ជីអត្រានុកូលដ្ឋាន និងការចុះបញ្ជីអត្តសញ្ញាណ ដោយផ្ដល់ចំពោះបុគ្គលម្នាក់ៗ នូវលេខសម្គាល់អត្តសញ្ញាណបុគ្គល។
និងទី៥- ធានានូវការគោរពសិទ្ធិមនុស្ស ការទទួលបានសេវាគ្រប់ប្រភេទ ហើយជាមូលដ្ឋាន សម្រាប់រៀបចំផែនការអភិវឌ្ឍន៍ និងការតាមដានភាពរីកចម្រើននៃសង្គម។
ជាងនេះទៅទៀត ច្បាប់នេះមានវិសាលភាព អនុវត្តចំពោះជនគ្រប់រូបដែលនៅលើទឹកដីនៃព្រះរាជាណាចក្រកម្ពុជា និងប្រជាពលរដ្ឋខ្មែរ ដែលរស់នៅឯបរទេស។
សូមរំលឹកថា កិច្ចប្រជុំនាពេលព្រឹកនេះ គឺជាលើកទី១៤ ដែលក្រសួងមហាផ្ទៃ បានរៀបចំកិច្ចប្រជុំអន្ដរក្រសួងពិនិត្យ និងពិភាក្សាលើសេចក្ដីព្រាងច្បាប់ស្ដីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនេះ៕ រតនា
ដោយ៖ នាយកដ្ឋានព័ត៌មានវិទ្យា