រាជធានីភ្នំពេញ៖ ដូចការគ្រោងទុកវគ្គបណ្តុះបណ្តាលរយ:ពេល៣ថ្ងៃស្តីពីការងាេព្យាបាល និងស្តារនីតិសម្បទាអ្នកញៀនគ្រឿងញៀនសម្រាប់មន្រ្តីទៅបម្រេីការងារនៅមជ្ឈមណ្ឌលជាតិបានបិទបញ្ចប់ហេីយនៅថ្ងៃទី១៣ ខែសីហា ឆ្នាំ២០២០ នេះក្រោមអធិបតីភាព ឯកឧត្តម ធូ ស៊ុន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា និងវត្តមានលោកចារ៉េ ប៉ុកប៉ា មន្រ្តីទទួលបន្ទុកការងារគ្រឿងញៀនអមស្ថានទូតថៃ-នគរបាលអមស្ថានទូតថៃប្រចាំកម្ពុជា និងលោកជំទាវ ឧត្តមសេនីយ៍ឯក ជ័យ បុប្ផា និងមន្រ្តីតំណាងស្ថាប័នអង្គភាពពាក់ព័ន្ធរបស់អាជ្ញាធរជាតិប្រយុទ្ធប្រឆាំងគ្រឿងញៀន។
ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានមានប្រសាសន៍រាយការណ៍ ពីលទ្ធផលនៃវគ្គបណ្តុះបណ្តាលថា តាមរយ:បទបង្ហាញចែករំលែកបទពិសោធន៍ពីសំណាក់វាគ្មិនជំនាញសិក្ខាកាមទទួលបានចំណេះដឹងមាននិទ្ទេសល្អ៤៤ភាគរយល្អបង្គួរ៤៨ភាគរយ មធ្យម៧ភាគរយ និងនិទ្ទេសខ្សោយគ្មាន ហេីយទាំងអ្នករៀបចំ សិក្ខាកាម និងវាគ្មិនទាំងអស់បានរួមគ្នាសហការគ្នាយ៉ាងល្អលេីការងារបណ្តុះបណ្តាលនេះ។
ថ្លែងទៅកាន់អង្គពិធីទាំងមូលក្នុងឱកាសនោះ ឯកឧត្តម ធូ ស៊ុន បានថ្លែងសាទរដល់លទ្ធផលនៃវគ្គបណ្តុះបណ្តាលទទួលបានហេីយសូមឱ្យអ្នកទទួលបានការបណ្តុះបណ្តាលនាពេលនេះក្លាយធនធានមនុស្សប្រកបដោយសក្តានុពលចូលរួមផ្តល់សេវាដល់ជនរងគ្រោះដោយសារគ្រឿងញៀនទាំងមជ្ឈមណ្ឌលជាតិ និងមជ្ឈមណ្ឌលបណ្តោះអាសន្ននានា។
ក្នុងឱកាសនោះ ឯកឧត្ដម ធូ ស៊ុន រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍បន្ថែមថាបញ្ហាគ្រឿងញៀនទាំងនៅក្នុងតំបន់និងពិភពលោកមិនមានសញ្ញាថមថយទេហេីយកម្ពុជានៅតែបន្តរងគ្រោះដោយសារគ្រឿងញៀនសំយោគ។ តាមរយៈយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលជនល្មេីសជួញដូរបង្រ្កាបជនល្មេីសជួញដូរ ចែកចាយគ្រឿងញៀនជាច្រេីនត្រូវបានដាក់ទោសទណ្ឌតាមច្បាប់និងធ្ងន់ធ្ងរ ហេីយអ្នកដែលរងគ្រោះដោយសារគ្រឿងញៀនត្រូវបានធ្វេីការព្យាបាល ស្តារនីតិសម្បទា និងសមាហរណកម្មទៅរស់ជាមួយក្រុមគ្រួសារនិងសហគមន៍វិញ។
ជាមួយគ្នានេះ ឯកឧត្តម ធូ ស៊ុន បានបន្ថែមថា ការដាក់ឱ្យដំណេីរនូវមជ្ឈមណ្ឌលជាតិផ្តល់សេវាព្យាបាលដោយស្ម័គ្រចិត្តនិងផ្អែកលេីសហគមន៍ដល់អ្នកញៀនគ្រឿងញៀនខេត្តព្រះសីហនុ ដែកដាក់ឱ្យដំណេីរការនៅខែវិច្ឆិកាឆ្នាំ២០២០ខាងមុខគឺជាមជ្ឈមណ្ឌលផ្តល់ចំណេះជំនាញ និងផ្តល់ឱកាសការងារសម្រាប់ប្អូនក្មួយៗជាជនរងគ្រោះដោយសារគ្រឿងញៀនពេលបានបំពេញលក្ខខណ្ឌនៃការព្យាបាលស្តារនីតិសម្បទារួចរាល់។
ជាមួយគ្នានេះដែរ ឯកឧត្តម ធូ ស៊ុន បានថ្លែងអំណរគុណរាជរដ្ឋាភិបាលថៃតាមរយ:ក្រុមប្រឹក្សាត្រួតពិនិត្យគ្រឿងញៀនព្រះរាជាណាចក្រថៃតែងតែផ្តល់កិច្ចសហការលេីការងារត្រួតពិនិត្យគ្រឿងញៀនពិសេសថ្មីៗនេះ បានជួយផ្តល់ថវិកាចូលរួមចំណែកកសាងមជ្ឈមណ្ឌលជាតិនៅខេត្ត និងស្នេីសុំឱ្យថៃបន្តជួយដល់កម្ពុជាបន្ថែមទៀត។
ជាទីបញ្ចប់មានកម្មវិធីប្រគល់ជូននូវលិខិតសសេីរដល់វាគ្មិនដែលចូលរួមចែករំលែកបទពិសោធន៍ និងប្រគល់វិញ្ញាបនបត្របញ្ជាក់ការសិក្សាជូនដល់សិក្ខាកាមដែលចូលរួមក្នុងវគ្គបណ្តុះបណ្តាលនេះផងដែរ៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន