នៅព្រឹកថ្ងៃទី០៥ ខែតុលា ឆ្នាំ២០១៧ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បាអញ្ជើញ ជាអធិបតីភាពដ៏ខ្ពង់ខ្ពស់ក្នុងកិច្ចប្រជុំ "ស្តីពីការបង្កើតយន្តការផ្តល់លិខិតធ្វើដំណើរជូនពលករកម្ពុជា ដែលមានបំណង រកការងារធ្វើសម្រាប់អ្នកខេត្តបាត់ដំបង និងខេត្តបន្ទាយមានជ័យ" ដែលបានរៀបចំរួមគ្នាដោយក្រសួងមហាផ្ទៃ និង ក្រសួង ការងារ និងបណ្តុះបណ្តាលវិជ្ជាជីវៈ។ ក្នុងការអនុវត្តជាក់ស្តែងតាមក្របខណ្ឌច្បាប់ និងបែបបទនីតិវិធី សម្រាប់ពលករទៅធ្វើការនៅបរទេសមានលក្ខណៈស្មុគស្មាញច្រើន ជាពិសេសពលករដែលនៅតាមបណ្តាខេត្តជាប់ព្រំដែនហើយមាន បំណងទៅធ្វើការនៅ ប្រទេសថៃដោយមិនឆ្លងកាត់តាមក្របខណ្ឌ(MOU) ព្រមទាំងគួបផ្សំនិងការចាញ់បោកមេខ្យល់ដែលទាមទារកម្រៃខ្ពស់សម្រាប់រត់ការជាមួយក្រសួងពាក់ព័ន្ធ ជាហេតុឱ្យពលករសម្រេចចិត្តចំណាកស្រុកដោយខុស ច្បាប់។ ដូច្នេះក្រសួងមហាផ្ទៃ និង ក្រសួងការងារនិងបណ្តុះបណ្តាលវិជ្ជាជីវៈ បានសហការគ្នា ក្នុងគោលបំណងដើម្បីបង្កលក្ខណៈងាយស្រួលជូនពលករ ក្នុងការទទួលបានភាពស្របច្បាប់ក្នុងការ ទៅស្វែងរកការងារធ្វើ និងជៀសវាងបានអំពីការចាញ់បោកពីសំណាក់មេខ្យល់។