នារសៀលថ្ងៃពុធ ទី២៤ ខែមិថុនា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន អញ្ជើញជាអធិបតីក្នុងកិច្ចប្រជុំត្រួតពិនិត្យការងាររបស់នាយកដ្ឋានរដ្ឋបាល សរុប ។
ឯកឧត្តម បានថ្លែងនាឱកាសនោះថា កិច្ចប្រជុំពេលនេះ គឺដើម្បីត្រួតពិនិត្យវឌ្ឍនភាពការងារ បញ្ហាប្រឈម និងសំណូមនានារបស់នាយកដ្ឋាន។

      ឯកឧត្តមបានកោតសរសើ និងវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយការទទួលខុសត្រូវខ្ពស់ សម្រេចលទ្ធផលបានល្អប្រសើរកន្លងមក ហើយថាជានាយកដ្ឋាននាំមុខគេ ជាពិសេសនាយកដ្ឋាននេះជាសេនាធិការឱ្យអគ្គាធិការដ្ឋាន លើការគ្រប់គ្រងចរាចរណ៍ ពិនិត្យកែសម្រួលឯកសារនានា និងការធ្វើការសម្របសម្រួលជាមួយនាយកដ្ឋានចំណុះអគ្គាធិការដ្ឋានបានល្អប្រសើរឆ្លើយតាមស្ថានភាពការងារជាក់ស្តែង។

      ទន្ទឹមនឹងនេះ ឯកឧត្តមបានជម្រុញដល់មន្រ្តីឱ្យខិតខំស្រាវជ្រាវបន្ថែមក្នុងការបង្កើនចំណេះដឹង ពាក់ព័ន្ធនឹងការអនុវត្តតួនាទីភារកិច្ចរបស់ខ្លួន។
បន្ទាប់មក ឯកឧត្តមបានមានមតិដឹកនាំមួយចំនួនមាន: ត្រូវគោរពតួនាទីតាមឋានានុក្រម របៀបរបបការងារ ពង្រឹងសមត្ថភាព ការបណ្តុះបណ្តាលមន្ត្រី បញ្ហាវត្តមានមន្ត្រី ការលើកទឹកចិត្តមន្ត្រី និងក្រមសីលធម៌ វិន័យ។ 

      អង្គប្រជុំក៏បានលើកឡើងនូវបញ្ហាប្រឈម សំណូមពរនានា ដើម្បីចូលរួមគ្នាដោះស្រាយ ក្នុងការបង្កលក្ខណៈងាយស្រួលដល់ការអនុវត្តការងារចំពោះមុខ។

      ជាកិច្ចបញ្ចប់អង្គប្រជុំ ឯកឧត្តម បានថ្លែងការអរគុណ និងសង្ឃឹមថា អស់លោក លោកស្រី នឹងបន្តកិច្ចខិតខំប្រឹងប្រែងបំពេញការងារជូនអង្គភាពដើម្បីទទួលបានលទ្ធផលកាន់តែល្អថែមទៀតផងដែរ។

      សូមជម្រាបថា នាយកដ្ឋានរដ្ឋបាល សរុប ជានាយកដ្ឋានចុងក្រោយគេ បន្ទាប់ពី ឯកឧត្តមបានដឹកនាំកិច្ចប្រជុំត្រួតពិនិត្យ ពង្រឹងបន្ថែមលើសកម្មភាពការងាររបស់នាយកដ្ឋានចំនួន៥មកហើយ ដើម្បីតម្រង់ទិសដៅការងារឱ្យស្របនឹងផែនសកម្មភាពការងារឆ្នាំ២០២០ និងផ្តល់នូវមតិដឹកនាំ ដោះស្រាយបញ្ហាប្រឈម សំនូមពរ មានកន្លងមក។

      កិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និង មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ជាប្រធាននាយកដ្ឋាន អនុប្រធាននាយកដ្ឋាន និងនាយការិយាល័យ៕

ប្រភព៖ អគ្គាធិការដ្ឋាន