ព្រឹកថ្ងៃពុធទី២៤ ខែមិថុនា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន អញ្ជើញជាអធិបតីក្នុងកិច្ចប្រជុំត្រួតពិនិត្យការងាររបស់នាយកដ្ឋានអធិការកិច្ច កិច្ចការនគរបាលថ្នាក់កណ្តាល។

      ថ្លែងនាឱកាសនោះ ឯកឧត្តមបានលើកឡើងពីគោលបំណងកិច្ចប្រជុំពេលនេះថា គឺដើម្បីត្រួតពិនិត្យវឌ្ឍនភាពការងារ បញ្ហាប្រឈម និងសំណូមនានារបស់នាយកដ្ឋាន។ ឯកឧត្តមបានសង្កត់ធ្ងន់ថា ក្នុងនាមជាមន្ត្រីអធិការកិច្ចត្រូវប្រកាន់ខ្ជាប់នូវវិជ្ជាជីវៈ តម្លាភាព សីលធម៌ ភាពទន់ភ្លន់តែម៉ឹងម៉ាត់ពេលចុះបំពេញបេសកកម្មរបស់ខ្លួន ត្រូវឈរលើរគោលការណ៍ច្បាប់ និងលិខិតបទដ្ឋានគតិយុត្តជាមូលដ្ឋាន ត្រូវជៀសវាងដាច់ខាត កុំឆ្លៀតឱកាស ទាញយក ឬបម្រើផលប្រយោជន៍របស់ខ្លួន។ហេតុនេះ ចាំបាច់ទាមទារត្រូវមានសមត្ថកិច្ចគ្រប់គ្រាន់  និងបានជម្រុញដល់មន្រ្តីឱ្យខិតខំស្រាវជ្រាវបន្ថែមក្នុងការបង្កើនចំណេះដឹង ដោយសារយើងមានភារកិច្ចត្រួតពិនិត្យការអនុវត្តតួនាទីរបស់អង្គភាពថ្នាក់កណ្តាលចំណុះក្រសួងមហាផ្ទៃ ដែលយើងត្រូវស្វែងយល់ពីលិខិតបទដ្ឋានពាក់ព័ន្ធនឹងការអនុវត្តតួនាទីភារកិច្ចរបស់អង្គភាពទាំងនោះ ទន្ទឹមនឹងនេះ យើងត្រូវបន្តរក្សាវប្បធម៌ចែករំលែកនូវបទពិសោធន៍ ចំណេះដឹងដល់គ្នា ដោយតម្កល់ផលប្រយោជន៍របស់អង្គភាពជាធំ។

      បន្ទាប់មក ឯកឧត្តមបានមានមតិដឹកនាំមួយចំនួនមាន: ត្រូវគោរពតួនាទីតាមឋានានុក្រម របៀបរបបការងារ ពង្រឹងសមត្ថភាព ការបណ្តុះបណ្តាលមន្ត្រី បញ្ហាវត្តមានមន្ត្រី ការលើកទឹកមន្ត្រី ដោះស្រាយបណ្តឹងឈរលើគោលការណ៍ប្រកបដោយយុត្តិធម៌ ក្រមសីលធម៌ វិន័យ និងពន្លឿនដោះស្រាយសំណុំរឿង។

      អង្គប្រជុំក៏បានលើកឡើងនូវបញ្ហាប្រឈម សំណូមនានា ដើម្បីចូលរួមគ្នាដោះស្រាយ ក្នុងការបង្កលក្ខណៈងាយស្រួលដល់ការអនុវត្តការងារចំពោះមុខ។

      ជាកិច្ចបញ្ចប់អង្គប្រជុំ ឯកឧត្តម បានថ្លែងការអរគុណ និងសង្ឃឹមថា អស់លោក លោកស្រី នឹងបន្តកិច្ចខិតខំប្រឹងប្រែងបំពេញការងារជូនអង្គភាពដើម្បីទទួលបានលទ្ធផលកាន់តែល្អថែមទៀតផងដែរ  ដោយអនុវត្តទិសដៅការងារបន្តត្រូវផ្អែកតាមផែនការសកម្មភាពឆ្នាំ២០២០របស់អគ្គាធិការដ្ឋាន ដែលជាផែនទីបង្ហាញផ្លូវ។

      កិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និង មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ជាប្រធាននាយកដ្ឋាន អនុប្រធាននាយកដ្ឋាន និងនាយការិយាល័យ៕

ប្រភព៖ អគ្គាធិការដ្ឋាន