សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈ កម្មាធិកា រជាតិសម្រាប់ការអភិវឌ្ឍតាមបែបប្រជាធិតេយ្យនៅថ្នាក់ក្រោមជាតិ គ.ជ.អ.ប បានប្រសាសន៍ថា គោលដៅលើកំណែទម្រង់របស់គ.ជ.អ.ប បាននោះគឺការបង្ខិតការងាររដ្ឋបាលឱ្យកាន់តែជិតប្រជាពលរដ្ឋ ក៏ប៉ុន្តែចំពោះផ្នែកនគរបាល គឺជានគរបាលរបស់ជាតិ ហើយកងទ័ពក៏ជារបស់ជាតិផងដែរដើម្បីបម្រើការងារជូនមាតុភូមិ។ នេះបើតាមប្រសាសន៍សម្ដេចក្រឡាហោម ស ខេង ថ្លែងក្នុងកិច្ចប្រជុំលើកទី១៨របស់គណៈកម្មាធិការជាតិ សម្រាប់ការអភិវឌ្ឍតាមបែបប្រជាធិតេយ្យ នៅថ្នាក់ក្រោមជាតិ គ.ជ.អ.ប នាថ្ងៃពុធទី១៧ ខែមិថុនា ឆ្នាំ២០២០ នៅទីស្ដីការក្រសួងមហាផ្ទៃ។
សម្ដេចក្រឡាហោម ស ខេង មានប្រសាសន៍បន្តថាការផ្ទេរអំណាចទៅថ្នាក់ ខេត្ត ស្រុក មិនមែនចង់បំបែកប្រទេសនោះទេ ប៉ុន្តែគ.ជ.អ.ប ធ្វើតាមគោលការណ៍។ សម្តេចក្រឡាហោម បន្ថែមថា នៅតាមបណ្តាប្រទេសមួយចំនួនគេឱ្យអំណាចទៅថ្នាក់ខេត្ត ស្រុក ប៉ុន្តែកម្ពុជា នគរបាល ជានគរបាលរបស់ជាតិ ហើយកងទ័ពក៏ជាកងទ័ពរបស់ជាតិ ដូច្នេះហើយទើបត្រូវប្រើយន្តការគណៈបញ្ជាការឯកភាព ដើម្បីសម្របសម្រួលបានរវាងនគរបាល និងកម្លាំងខាងយោធាទាំងអស់ បើមានបញ្ហាអ្វីត្រូវប្រជុំដោះស្រាយរួមគ្នា។
ជាមួយគ្នានេះសម្ដេចក្រឡាហោម ស ខេង មានប្រសាសន៍បន្ថែមថា គ.ជ.អ.ប មានគោលដៅកសាងរដ្ឋបាលឯកភាព ថ្នាក់ខេត្ត ថ្នាក់ស្រុក ដោយកន្លងទៅក្រសួងនីមួយៗគ្រប់គ្រងតាមជំនាញរបស់ខ្លួន ឯខេត្តគ្រប់គ្រងតាមបែបសហវិមជ្ឍការ ដែលការធ្វើបែបនេះ ធ្វើឱ្យកិច្ចការមួយចំនួនដំណើរការបានល្អ ហើយកិច្ចការមួយចំនួនទៀតពុំសូវបានល្អ ដូចច្នេះហើយទើប គ.ជ.អ.ប ធ្វើការអនុវត្តការផ្ទេរនូវរាល់ការងាររបស់ក្រសួង ដូចជាក្រសួងសុខាភិបាល ដែលបានផ្ទេរការងារទៅឱ្យខេត្ត គ្រប់គ្រងទៅលើ មន្ទីរពេទ្យបង្អែកស្រុក ប៉ុស្ត៍សុខភាព រីឯក្រសួងអប់រំ យុវជន និងកីឡា ក៏បានផ្ទេរការងារអប់រំថ្នាក់មត្តេយ្យ និងថ្នាក់បឋម ទៅថ្នាក់ខេត្តមួយចំនួន ដើម្បីសាកល្បងផងដែរ៕
ដោយ ៖ នាយកដ្ឋានព័ត៌មានវិទ្យា
