ព្រឹកថ្ងៃអង្គារ ទី២ ខែមិថុនា ឆ្នាំ២០២០ អគ្គាធិការដ្ឋាន ក្រសួងមហាផ្ទៃ មានបើកកិច្ចប្រជុំពិភាក្សារបាយការណ៍ស្តីពីសកម្មភាពការងារប្រចាំខែឧសភា និងទិសដៅការងារបន្តសម្រាប់ខែមិថុនាឆ្នាំ២០២០ ដឹកនាំដោយ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន។
ឯកឧត្តមបានផ្តល់អនុសាសន៍ណែនាំដល់ក្រុមការងាររៀបចំរបាយការណ៍ពិនិត្យពីទិសដៅការងារបន្ត ត្រូវរៀបចំឱ្យស្របនឹងផែនការសកម្មភាពឆ្នាំ២០២០របស់អគ្គាធិការដ្ឋាន ដែលជាផែនទីចង្អុលផ្លូវសម្រាប់ការអនុវត្តសកម្មភាពរបស់ខ្លួន។
ឯកឧត្តមបានបន្តមានមតិណែនាំលើការអនុវត្តការងារមួយចំនួនរបស់ ឯកឧត្តម លោកជំទាវ អគ្គាធិការរង និងនាយកដ្ឋានចំណុះអគ្គាធិការដ្ឋានផងដែរ។
ជាចុងបញ្ចប់ ឯកឧត្តម បានថ្លែងការអរគុណដល់ឯកឧត្តម លោកជំទាវ អស់លោក លោកស្រីដែលបានខិតខំបំពេញការងារជូនអង្គភាព ដោយរក្សាសាមគ្គីភាព សហការគ្នា គោរពអនុវត្តតួនាទីភារកិច្ច ដែលបានសម្រេចលទ្ធផលល្អកន្លងមក និងបានកោតសរសើដល់ក្រុមការងាររៀបចំរបាយការណ៍ចំពោះរបាយការណ៍កាន់តែមានភាពល្អប្រសើរជាលំដាប់។
ដោយកិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និង មានការអញ្ជើញចូលរួមពី ឯកឧត្តម លោកជំទាវ អគ្គាធិការរង ប្រធាននាយកដ្ឋាន អនុប្រធាននាយកដ្ឋាន និងមន្ត្រីជំនាញ៕
ប្រភព៖ អគ្គាធិការដ្ឋាន