សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថា យុទ្ធនាការដោះស្រាយសំណុំរឿងកកស្ទះរបស់រដ្ឋមន្រ្តីក្រសួងយុត្តិធម៌នេះ គឺពិតជាមានសារៈសំខាន់ និងមានអត្ថន័យយ៉ាងជ្រាលជ្រៅដល់កិត្យានុភាពរបស់កម្ពុជា ក្នុងការលើកកម្ពស់ដោះស្រាយ បញ្ហាអសកម្មនានា នៅក្នុងពន្ធនាគារផងដែរ។
សម្តេចក្រឡាហោមបានលើកឡើងដូចនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំ ផ្សព្វផ្សាយរបាយការណ៍ជាតិការងារប្រយុទ្ធប្រឆាំងអំពើជួញដូរមនុស្ស ឆ្នាំ២០១៩ និងលើកទិសដៅការងារឆ្នាំ២០២០ របស់គណៈកម្មធិការជាតិប្រយុទ្ធប្រឆាំងអំពើជួញដូរមនុស្ស នាព្រឹកថ្ងៃពុធ ទី២៧ ខែឧសភា ឆ្នាំ២០២០នេះ នៅទីស្ដីការក្រសួងមហាផ្ទៃ។
សម្ដេចក្រឡាហោម បានមានប្រសាសន៍បន្តថា សម្រាប់យុទ្ធនាការនេះផងដែរ ក៏បានចូលរួម ដោះស្រាយបញ្ហាជាច្រើនដល់រាជរដ្ឋាភិបាលដោយក្នុងនោះរួមមាន ភាពចង្អៀតណែនក្នុងពន្ធនាគារ និងជួយកាត់បន្ថយការចំណាយថវិកា ក្នុងការផ្គត់ផ្គង់អ្នកជាប់ឃុំ រួមទាំងបញ្ហាសិទ្ធិមនុស្សផងដែរ។
ទន្ទឹមនឹងនេះ សម្ដេចក្រឡាហោម ក៏បានស្នើដល់អាជ្ញាធរមូលដ្ឋានទាំងអស់ត្រូវធ្វើយ៉ាងណា គ្រប់គ្រងអោយបាននូវរាល់អ្នកជាប់ឃុំទាំងអស់ដែល ត្រូវបានក្រសួងយុត្តិធម៌ សម្រេចសម្រាលបន្ធូរបន្ថយទោស ហើយដោះលែងទៅតាមមូលដ្ឋានរបស់ខ្លួន។
ប្រសាសន៍សម្តេច៖ ក្នុងយុទ្ធនាការនេះផងដែរ តុលាការអាចនឹងដោះលែងអ្នកជាប់ឃុំណាដែលបានអនុវត្តទោសបានជិតចប់ ហើយប្រព្រឹត្តបទល្មើសស្រាល មិនមែនជាបទល្មើសឧក្រិដ្ឋ។ ចឹងវាអាចធ្លាក់ជាបន្ទុករបស់រដ្ឋបាលដែនដីរបស់យើងដូចជាសមត្ថកិច្ច នគរបាល កងរាជអាវុធហត្ថ ដើម្បីគ្រប់គ្រងសន្តិសុខនៅកន្លែងនោះ។
ពាក់ព័ន្ធនឹងចំណុចនេះ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានលើកឡើងដែរថា ការអនុវត្តទាំងអស់នេះ ត្រូវធ្វើតាមនីតិវិធីច្បាប់ ក្នុងករណីបទល្មើសស្រាល ហើយច្បាប់ បានអនុញ្ញាត ប៉ុន្តែយើងត្រូវព្យាយាមគ្រប់គ្រងមុខសញ្ញា ថាគាត់បានកែប្រែខ្លួនឬយ៉ាងណា ប្រសិនបើមិនកែប្រែខ្លួនទេ ច្បាប់ត្រូវអនុវត្តបន្តទៀត៕ កញ្ញា
ដោយ៖ នាយកដ្ឋានព័ត៌មានវិទ្យា