សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍វាយតម្លៃខ្ពស់ចំពោះកិច្ច សហប្រតិបត្តការនៃទំនាក់ទំនងដ៏ល្អរវាងកម្ពុជា និងសហរដ្ឋអាមេរិក ជាពិសេសចាប់តាំងពីការ ចាប់ផ្តើមអាណត្តិការងាររបស់ ឯកឧត្តម Patrick Murphyនៅកម្ពុជា។
សម្តេចក្រឡាហោម ក៏បង្ហាញក្តីសង្ឃឹមថាទំនាក់ទំនងរវាងប្រទេសទាំងពីរ ក្នុងអាណត្តិការងាររបស់ឯកឧត្តមនឹងនៅតែបន្តរីកចំរើនបន្ថែមទៀត។ សម្តេចក្រឡាហោម ក៏បានមានប្រសាសន៍បែបនេះនារសៀលថ្ងៃអង្គារ ទី២៦ ខែឧសភា ឆ្នាំ២០២០ ក្នុងជំនួបពិភាក្សាការងារជាមួយឯកឧត្តម Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ព្រមទាំងសហការី នៅទីស្ដីការក្រសួងមហាផ្ទៃ។
ជាការឆ្លើយតបទៅនឹងប្រសាសន៍ស្វាគមន៍របស់សម្តេចក្រឡាហោម ចំពោះទំនាក់ទំនងជារួមរបស់ប្រទេសទាំងពីរ ឯកឧត្តម Patrick Murphy ក៏បានកត់សម្គាល់នូវកិច្ចសហប្រតិបត្តការល្អទៅលើចំណុចពីរ គឺទី១ទៅលើស្ថាប័នអនុវត្តច្បាប់ និងទី២ទៅលើវិស័យសុខភាពសាធារណៈ៕
ដោយ៖ នាយកដ្ឋានព័ត៌មានវិទ្យា
