សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ ព្រមទាំងថ្នាក់ដឹកនាំ មន្ត្រីរាជការស៊ីវិល និងនគរបាលជាតិ នៃក្រសួងមហាផ្ទៃ នៅថ្ងៃទី១៦ ខែឧសភា ឆ្នាំ២០២០ បានផ្ញើសារចូលរួមរំលែកមរណទុក្ខ ជាមួយលោកជំទាវ សួស ណារ៉ា និង ក្រុមគ្រួសារសព ឯកឧត្តម ហ៊ឹម ឆែម ទេសរដ្ឋមន្ត្រីទទួលបន្ទុកបេសកកម្មពិសេស និងជាអតីតរដ្ឋមន្ត្រីក្រសួងធម្មការនិង សាសនា ដែលបានទទួលមរណភាព កាលពីថ្ងៃសៅរ៍ ទី១៦ ខែឧសភា ឆ្នាំ២០២០ ក្នុងជន្មាយុ ៨២ឆ្នាំដោយរោគគាពាធ។

      សម្តេចក្រឡាហោម ស ខេង បានចាត់ទុកថា ឯកឧត្តម ហ៊ឹម ឆែម គឺជាបញ្ញវន្តដ៏ឆ្នើម មួយរូបដែលបានចូលរួមចំណែកតស៊ូបម្រើយ៉ាងសកម្មប្រកបដោយស្វាមីភក្តិយ៉ាងស្មោះស្ម័គ្រក្នុងបុព្វហេតុ ជាតិ សាសនា ព្រះមហាក្សត្ររហូតដល់នាទីច្រុងក្រោយនៃជីវិរបស់ឯកឧត្តម។ ជាងនេះទៀត មរណភាពរបស់ ឯកឧត្តម ហ៊ឹម ឆែមគឺជាការបាត់បង់នូវស្វាមី ឳពុក និងជីតាជាទីគោរព ស្រឡាញ់ដ៏ជ្រាលជ្រៅរបស់ក្រុមគ្រួសារ មិនតែប៉ុណ្ណោះទេ ថែមទាំងបានបាត់បង់នូវឥស្សរជនជាន់ខ្ពស់មួយរូបរបស់ជាតិដែលបានលះបង់កម្លាំងកាយ និងប្រាជ្ញាស្មារតីមិនខ្លាចនឿយហត់ ចូលរួមកសាងសង្គមជាតិ តាមរយៈការលើកកម្ពស់នូវគុណតម្លៃវប្បធម៌ និងព្រះពុទ្ធសាសនា។

      តាងនាមថ្នាក់ដឹកនាំ មន្ត្រីរាជការស៊ីវិល និងនគរបាលជា តិ នៃក្រសួងមហាផ្ទៃ សម្តេចក្រឡាហោម ស ខេង និងលោកជំទាវ សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ហ៊ឹម ឆែម បានសោយសុខក្នុងសុគតិភពកុំបីឃ្លៀងឃ្លាតឡើយ៕

ដោយ៖ នាយកដ្ឋានព័ត៌មានវិទ្យា