នារសៀលថ្ងៃព្រហស្បតិ៍ ទី៧ ខែឧសភា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន អញ្ជើញដឹកនាំកិច្ចប្រជុំពិភាក្សាឆ្លងរបាយការណ៍ស្តីពីលទ្ធផល នៃការអង្កេតស្រាវជ្រាវ ចំនួន២ករណីមានដូចខាងក្រោម÷
- ករណីបណ្តឹងរបស់ប្រជាពលរដ្ឋគោរពជូនសម្តេចក្រឡាហោមមេត្តាជួយដោះស្រាយដោយប្តឹងលោកស្រីវរសេនីយ៍ត្រីមួយរូប ថាសន្យាជួយរត់ការឱ្យចូលក្របខណ្ឌនគរបាលជាតិ ជាថ្នូរនឹងប្រាក់។
- ករណីសារព័ត៌មានចុះផ្សាយថា មន្ត្រីបម្រើការងារនៅច្រកទ្វារព្រំដែនអន្តរជាតិមួយ បានឃុបឃិតគ្នាប្រើវិធីគៀបយកលុយពីប្រជាពលរដ្ឋដែលបានឆ្លងដែនចូលប្រទេសថៃ ថែមទាំងបានអនុញ្ញាតឱ្យទំនិញគេចពន្ធ និងទំនិញបង់ពន្ធដែរ តែបង់មិនគ្រប់តាមចំនួនកំណត់ អាចនាំចូលពីប្រទេសថៃបានយ៉ាងរលូន។
កិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និង មានការអញ្ជើញចូលរួមពី ឯកឧត្តម លោកជំទាវ អគ្គាធិការរង ប្រធាននាយកដ្ឋាន អនុប្រធាននាយកដ្ឋាន និងមន្ត្រីជំនាញ៕
ប្រភព៖ អគ្គាធិការដ្ឋាន