នៅព្រឹកថ្ងៃសុក្រ ទី០១ ខែឧសភា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋានក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំបឹងព្រះនៃស្រុកបាភ្នំ ខេត្តព្រៃវែង អញ្ជើញចុះតាមខ្នងផ្ទះណែនាំអប់រំ និងផ្សព្វផ្សាយនូវវិធានការបង្ការ ការពារ ទប់ស្កាត់នឹងការរីករាលដាលជំងឺកូវីដ-១៩ (COVID-19) ជាអាទិ៍ ការរស់នៅអនាម័យខ្ជាប់ខ្ជួន លាងដៃនឹងសាប៊ូ ឬអាកុល រក្សាគំលាតឲ្យបានសមស្រប ពាក់ម៉ាស់ ជៀសវាងការប្រមូលផ្តុំគ្នាមានមនុស្សច្រើន ដល់បងប្អូនប្រជាពលរដ្ឋ ជាពិសេសណែនាំបងប្អូនចំណាកស្រុកដែលបានវិលមកស្រុកកំណើតក្នុងឱកាសចូលឆ្នាំថ្មីកន្លងមកនេះ ដែលមួយចំនួនកំពុងតែមានបំណងវិលត្រលប់ទៅធ្វើការនៅប្រទេសថៃវិញ ខណៈប្រទេសថៃបានពន្យាការបិទប្រទេសបន្ត ដោយសារការរាតត្បាតកាន់តែខ្លាំងពីជំងឺកូវីត-១៩ ។
ឆ្លៀតនាឱកាសនោះ ឯកឧត្តម ក៏បានសំដែងសេចក្តីសោមនស្សរីករាយ និងការអរគុណដល់បងប្អូនដែលបានចូលរួមអនុវត្តតាមការដឹកនាំរបស់រាជរដ្ឋាភិបាល និងការណែនាំរបស់ក្រសួងសុខាភិបាល គិតត្រឹមថ្ងៃនេះ ប្រទេសយើងមិនទាន់មានករណីការឆ្លងរីករាលដាលនៅក្នុងសហគមន៍នៅឡើយទេ និងសូមបងប្អូនបន្តអនុវត្តតទៀត។ បន្ទាប់ពីការចុះជួបតាមខ្នងផ្ទះមក ឯកឧត្តម បានចុះសិក្សា និងពិនិត្យមើលផ្លូវមួយខ្សែចូលទៅកាន់វត្តបឹងព្រះដែលរងការខូចខាត តាមការរាយការណ៍ពីលោកមេឃុំថា ផ្លូវនេះមានសប្បុរសជនធានាជួសជុល តែក្រោយមកបានផ្អាកទៅវិញដោយសារគ្មានលទ្ធភាព។ អញ្ជើញអមដំណើរនាឱកាសនោះមាន លោកអភិបាលស្រុកបាភ្នំ សមាជិកក្រុមការងារ មេឃុំ និងអ្នកពាក់ព័ន្ធជាច្រើនរូបទៀត ៕
ប្រភព៖ អគ្គាធិការដ្ឋាន