នៅទីស្តីក្រសួងមហាផ្ទៃ នាព្រឹកថ្ងៃអង្គារ ទី២៨ ខែមេសា ឆ្នាំ២០២០ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំអន្តរក្រសួង ដើម្បីពិនិត្យឆ្លងសេចក្តីព្រាងច្បាប់ចំនួន២ គឺសេចក្តីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងសេចក្តីព្រាងច្បាប់ស្តីពីការប្រឆាំងការរីកសាយភាយហិរញ្ញប្បទានអាវុធមហាប្រល័យ ដោយមានការចូលរួមពី ថ្នាក់ដឹកនាំ មន្រ្តីជាន់ខ្ពស់នៃក្រសួង ស្ថាប័នពាក់ព័ន្ធ មន្រ្តីជំនាញផ្នែកច្បាប់ និងអង្គភាពពាក់ព័ន្ធជាច្រើនផងដែរ។

      ក្នុងឱកាសនោះ សម្ដេចក្រឡាហោម ស ខេង បានមានប្រសាសន៍ថា «កិច្ចប្រជុំអន្តរក្រសួង នាព្រឹកថ្ងៃនេះ ដើម្បីពិនិត្យកែសម្រួល និងឆ្លងសេចក្ដីព្រាងច្បាប់ទាំងពីរនេះ គឺជាកិច្ចប្រជុំលើកចុងក្រោយហើយ ដោយសារចំណុច ដែលត្រូវកែសម្រួល ក្នុងច្បាប់នេះនៅតិចតួចប៉ុណ្ណោះ»។

      សម្ដេចក្រឡាហោម ស ខេង បានបញ្ជាក់ថា សេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងពិនិត្យកែសម្រួលបន្ថែមលើសេចក្តីព្រាងច្បាប់ស្តីពីការប្រឆាំងការរីកសាយភាយហិរញ្ញប្បទានអាវុធមហាប្រល័យ នឹងត្រូវបញ្ជូនទៅសុំការអនុម័តពីគណៈរដ្ឋមន្ត្រី ក្នុងពេលតែមួយតែម្ដង នាពេលខាងមុខនេះ។

      សម្ដេចក្រឡាហោម បានមានប្រសាសន៍បន្ថែមថា ក្នុងរយៈកាលកន្លងមក កម្ពុជាត្រូវបានគេដាក់ជាប្រទេសក្នុងបញ្ជីប្រផេះ ដែលបណ្តាប្រទេសទាំងនេះគឺជាប្រទេសមានហានីភ័យខ្ពស់ ដែលនេះជាហេតុមួយបានធ្វើឱ្យអ្នកវិនិយោគ ជាច្រើនមានការរារែក សម្រាប់ការធ្វើវិនិយោគ របស់ខ្លួននៅកម្ពុជា។

      សម្ដេចក្រឡាហោម បានមានប្រសាសន៍បន្ថែមថា សេចក្ដីព្រាងច្បាប់ទាំងពីរនេះ ធ្វើឡើងដើម្បីឆ្លើយតបនឹងការវិវត្តន៍សង្គមផង និងដើម្បីឱ្យ ស្របទៅនឹងបទដ្ឋានអន្តរជាតិដែលតម្រូវឱ្យកម្ពុជា មានយន្តការជាក់លាក់ផង។ សម្តេចក្រឡាហោម បានបន្ថែមដែរថា កម្ពុជាត្រូវតែវិវឌ្ឍន៍ខ្លួនអោយផុតពីប្រទេសក្នុងបញ្ជីប្រផេះ តាមរយៈការបង្កើតច្បាប់ ទាំងពីរនេះ អោយ ចេញជារូបរាង ដើម្បីផ្តល់ទំនុកចិត្តដល់អ្នកវិយោគទាំងឡាយ៕

ដោយ៖ នាយកដ្ឋានព័ត៌មានវិទ្យា