នាព្រឹកថ្ងៃព្រហស្បតិ៍ ទី២៣ ខែមេសា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបដីដ៏ខ្ពង់ខ្ពស់ក្នុងកិច្ចប្រជុំឆ្លងផែនការសកម្មភាពឆ្នាំ២០២០ របស់អគ្គនាយកដ្ឋានអន្ដោប្រវេសន៍ នាទីស្តីការក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការក្រសួងមហាផ្ទៃ អគ្គស្នងការដ្ឋាននគរបាលជាតិ ព្រមទាំងអង្គភាព និងភាគីពាក់ព័ន្ធជាច្រើនរូបទៀតផងដែរ។
សម្ដេចក្រឡាហោម ស ខេង បានមានប្រសាសន៍ថា ទាក់ទងទៅនឹងការជ្រើសរើសធនធានមនុស្សសម្រាប់អគ្គនាយកដ្ឋានអន្ដោប្រវេសន៍ ត្រូវតែជាអ្នករៀនច្បាប់ ជាតិ-អន្ដរជាតិ ដោយហេតុថាបច្ចុប្បន្ន ជនបរទេសជាច្រើនមកធ្វើការងារនៅកម្ពុជា ហើយយើងក៏ត្រូវការច្បាប់សម្រាប់គ្រប់គ្រងពួកគាត់ផងដែរ។ សម្ដេចក្រឡាហោមមានប្រសាសន៍បន្ថែមទៀតថា សម្រាប់បុគ្គលិករបស់អង្គការអន្ដរជាតិនានា និងមន្ដ្រីការទូត ដែលមកបំពេញការងារនៅកម្ពុជា ក៏សុទ្ធតែមានអ្នកច្បាប់របស់ពួកគេផងដែរ។
ព្រមជាមួយគ្នានោះសម្ដេចក្រឡាហោមក៏បាន អំពាវនាវទៅដល់ភាគីពាក់ព័ន្ធទាំងអស់ ត្រូវបណ្ដុះបណ្ដាលធនធានមនុស្សបន្ថែមទៀត ដើម្បីពង្រឹងការងារអន្តោប្រវេសន៍នៅកម្ពុជាអោយកាន់តែមានប្រសិទ្ធភាពខ្ពស់៕
ដោយ៖ នាយកដ្ឋានព័ត៌មានវិទ្យា