ព្រឹកថ្ងៃសុក្រ ទី១៤ ខែកុម្ភៈ ឆ្នាំ២០២០ ឯកឧត្តម អ៉ីវ លាង អនុប្រធានក្រុមការងារថ្នាក់ជាតិចុះជួយស្រុកបាភ្នំ និងជាអគ្គាធិការ នៃអគ្គាធិការដ្ឋានក្រសួងមហាផ្ទៃ អញ្ជើញជួបសំណេះសំណាលជាមួយបងប្អូនប្រជាពលរដ្ឋ ស្ថិតនៅក្នុងវត្តស្នែរាន ភូមិស្នែរាន ឃុំបឹងព្រះ ស្រុកបាភ្នំ ខេត្តព្រៃវែង។
បន្ទាប់ពីបានស្តាប់សេចក្តីរាយការណ៍សង្ខេបអំពីសភាពការណ៍ទូទៅនៅក្នុងឃុំរួចមក ឯកឧត្តមបានថ្លែងការអរគុណនិងកោតសរសើរ វាយតម្លៃខ្ពស់ចំពោះការខិតខំប្រឹងប្រែងរបស់ក្រុមការងារទាំងថ្នាក់កណ្តាលនិងមូលដ្ឋានដែលធ្វើសកម្មភាពដូចភ្លៀងរលឹម ជាពិសេសបានចំណាយកម្លាំងកាយ ពេលវេលា និងថវិកា ក្នុងការដោះស្រាយបញ្ហាប្រឈមនិងសំណូមពរមួយចំនួនរបស់បងប្អូននាពេលកន្លងមក និងស្នើក្រុមការងារបន្តសកម្មភាពបែបនេះតទៅទៀត។
ឯកឧត្តម បានបន្តទៀតថា រាជរដ្ឋាភិបាលដឹកនាំដោយសម្តេចតេជោ ហ៊ុន សែន បាននឹងកំពុងរក្សាសុខសន្តិភាព ហើយសន្តិភាពនេះទើបនាំមកនូវការអភិវឌ្ឍន៍មកទល់សព្វថ្ងៃ ហេតុនេះយើងសូម "អរគុណ សន្តិភាព "។ រាជរដ្ឋាភិបាល បានប្តេជ្ញារក្សាសុខសន្តិភាព អធិបតេយ្យជាតិ ឯករាជ្យជាតិ ដោយមិនធ្វើការដោះដូរនឹងជំនួយណាមួយដើម្បីឲ្យបរទេសចូលជ្រៀតជ្រែកកិច្ចការផ្ទៃក្នុងរបស់កម្ពុជានោះឡើយ។ កម្ពុជាក្រោមការដឹកនាំរបស់ សម្ដេចតេជោ ហ៊ុន សែន នាយករដ្ឋមន្ត្រី បានធ្វើអោយកម្ពុជា ទទួលបានសុខសន្តិភាព និងរីកចម្រើនលើគ្រប់វិស័យ ជាពិសេសវិស័យហេដ្ឋរចនាសម្ព័ន្ធ ស្ពាន ថ្នល់ ដែលជាសរសៃឈាមដ៏សំខាន់សម្រាប់ការអភិវឌ្ឍន៍ជាតិ។ សូមបងប្អូនចូលរួមថែរក្សា ការពារសន្តិភាព អោយបានគង់វង្ស ដើម្បីកម្ពុជាទទួលបានការអភិវឌ្ឍជាបន្តបន្ទាប់។
នៅពេលខាងមុខដ៏ខ្លីនេះ រោងចក្រមួយចំនួននឹងផ្អាកសកម្មភាពជាបណ្តោះអាសន្ន ដោយសារតែបញ្ហារីករាលដាលនៃជម្ងឺកូរ៉ូណាថ្មីកំពុងវាយប្រហារប្រទេសចិន ជាហេតុធ្វើឱ្យខ្វះវត្ថុធាតុដើម ព្រោះភាគច្រើននាំចូលពីប្រទេសចិន។ ឯកឧត្តមបានសង្កត់ធ្ងន់ថា សូមបងប្អូនកុំយល់ច្រឡំ កុំជឿតាមការផ្សព្វផ្សាយតាមហ្វេសប៊ុក សារព័ត៌មាន និងពួកអគិតមួយចំនួន តែងតែបំពុលសង្គមយើងនោះថា ការផ្អាកនេះដោយសារមកពីការដកEBAឱ្យសោះ ជាពិសេសសូមបងប្អូន ប្រាប់កូនចៅកំពុងបម្រើការងារនៅបណ្តារោងចក្រ កុំបារម្ភចំពោះបញ្ហាផ្អាកនេះ។
ពាក់ព័ន្ធនឹងជម្ងឺកូរ៉ូណាថ្មី បងប្អូនកុំមានការតក់ស្លុត ភ័យខ្លាចហួសហេតុ ជាពិសេសកុំជឿតាមប្រព័ន្ធសង្គមហ្វេសប៊ុកបានប្រឌិតព័ត៌មានមិនពិតនៅកម្ពុជា បងប្អូនសូមជឿលើតែដំណឹងចេញផ្សាយដោយក្រសួងសុខាភិបាល និងប្រមុខរដ្ឋាភិបាល។
ចំពោះបញ្ហាគ្រឿនញៀន បងប្អូនបន្តចូលរួមសហការផ្តល់ដំណឹងករណីមានការចែកចាយ ប្រើប្រាស់ ជូនមកសមត្ថកិច្ចមូលដ្ឋាន ព្រមទាំងចូលរួមគោរពច្បាប់ចរាចរណ៍ទាំងអស់គ្នា និងស្នើសមត្ថកិច្ចមូនដ្ឋានបន្តបង្រ្កាបបញ្ហាគ្រឿនញៀន ល្បែងស៊ីសង ដើម្បីអនុវត្តគោលនយោបាយភូមិ-ឃុំមានសុវត្ថិភាពប្រកបដោយប្រសិទ្ធភាព។
បងប្អូនប្រជាពលរដ្ឋបានលើកឡើងនូវបញ្ហាប្រឈម សំណូមពរ មានអណ្តូងទឹកចំនួន២ ឆ្លៀតពេលនោះលោកអាចារ្យវត្តស្នែរានបានស្នើសុំអញ្ជើញឯកឧត្តមជាអធិបតីក្នុងពិធីឆ្លងមហាកុដិក្នុងខែមេសាខាងមុខ ហើយឯកឧត្តមបានទទួលយក និងដោះស្រាយជូនតាមសំណូមពរទាំងអស់នោះភ្លាមៗតែម្តង។
ឆ្លៀតឱកាសជួបសំណេះសំណាលនោះដែរ ឯកឧត្តមបានផ្តល់ជូននូវលោកយាយទីទាល់ក្រចំនួន៤រូប ដោយទទួលបានអង្ករ១បេ ទឹកស៊ីអៀវ១យួរ ទឹកត្រី១យួរ មី១កេះ ទឹក១យួ ត្រីខ១យួរ និងថវិកាមួយចំនួន។
វេទិការនេះមានការអញ្ជើញចូលរួមពី ក្រុមការងារថ្នាក់ជាតិចុះជួយឃុំ ប្រធាន-សមាជិកក្រុមប្រឹក្សាស្រុក លោកអភិបាលរងស្រុក លោកអធិការស្រុក លោកមេឃុំ ក្រុមប្រឹក្សាឃុំ មេប៉ុស្តិ៍ ប្រធានមណ្ឌលសុខភាព មេភូមិ និងអាជ្ញាធរពាក់ព័ន្ធ៕
ប្រភព៖ អគ្គាធិការដ្ឋាន